പാലക്കാട്: ബൈക്ക് നിയന്ത്രണം വിട്ട് മറിഞ്ഞ് നവ വരന്‍ മരിച്ചു. മോളൂര്‍ തവളപ്പടിയില്‍ നടന്ന അപകടത്തില്‍ കരുമാനാം കുറുശ്ശി പുത്തന്‍ വീട്ടില്‍ ജിബിന്‍ (28) ആണ് മരിച്ചത്. ഭാര്യ ശ്രീഷ്മയ്ക്ക് ഗുരുതരമായി പരുക്കേല്‍ക്കുകയും ചെയ്തു. ഒരാഴ്ച മുമ്പായിരുന്നു ഇവരുടെ വിവാഹം നടന്നത്.
ഇന്നലെ ഉച്ചയ്ക്കായിരുന്നു ഇരുവരും സഞ്ചരിച്ച ബൈക്ക് അപകടത്തില്‍പ്പെട്ടത്. തൃശൂര്‍ കേച്ചേരിയിലുള്ള ശ്രീഷ്മയുടെ വീട്ടില്‍ നിന്നും മടങ്ങി വരുമ്പോഴാണ് അപകടം. കരുമാനാം കുറുശ്ശിയിലേക്ക് വരുന്നതിനിടെ മോളൂര്‍ തവളപ്പടിയിലെ ഇറക്കത്തില്‍ ബൈക്ക് നിയന്ത്രണം വിടുകയായിരുന്നു. സമീപത്തെ വീടിന്റെ മതിലിലാണ് ബൈക്ക് ഇടിച്ചത്.
ജിബിനും ശ്രീഷ്മയും ഹെല്‍മെറ്റ് ധരിച്ചിരുന്നുവെങ്കിലും അപകടത്തില്‍ ഇരുവര്‍ക്കും ഗുരുതര പരുക്കേല്‍ക്കുകയായിരുന്നു. ഉടന്‍ തന്നെ നാട്ടുകാര്‍ ആശുപത്രിയില്‍ എത്തിച്ചെങ്കിലും ജിബിന്‍ മരിക്കുകയായിരുന്നു.
