തിരുവനന്തപുരം: പയ്യന്നൂര്‍ സഹൃദയക്കൂട്ടത്തിന്റെ പ്രഥമ സമഗ്ര സംഭാവനാപുരസ്‌കാരം നാടകകൃത്തും സാഹിത്യനിരൂപകനും തിരക്കഥാകൃത്തുമായ എന്‍ ശശിധരന് നല്‍കുന്നു.
ഒരു ലക്ഷം രൂപയും ബാബു അന്നൂര്‍ രൂപകല്‍പ്പന ചെയ്ത ശില്പവും പ്രശസ്തിപത്രവും അടങ്ങുന്ന പുരസ്‌കാരം സാഹിത്യ ചലച്ചിത്ര മേഖലയിലെ പ്രമുഖര്‍ ചേര്‍ന്ന് ജനുവരി ആദ്യം പയ്യന്നൂരില്‍ എന്‍ ശശിധരന് സമ്മാനിക്കും. പുരസ്‌കാര സമര്‍പ്പണത്തോടും ആദര സമ്മേളനത്തോടും ഒപ്പം സെമിനാറുകളും സൗഹൃദ കൂട്ടായ്മകളും ചിത്രപ്രദര്‍ശനവും ഡോക്യുമെന്ററി /നാടക അവതരണങ്ങളും ഉണ്ടാകും.
പരിപാടിയുടെ വിശദമായ ബ്രോഷര്‍ പ്രകാശനം അന്താരാഷ്ട്ര ചലച്ചിത്രോത്സവ വേദിയായ ടാഗോര്‍ തിയേറ്ററില്‍ പ്രശസ്ത ചലച്ചിത്ര സംവിധായകന്‍ ടിവി ചന്ദ്രന്‍ നിര്‍വഹിച്ചു. എഴുത്തുകാരായ സക്കറിയ, മാങ്ങാട് രത്‌നാകരന്‍ തുടങ്ങിയവര്‍ ബ്രോഷര്‍ ഏറ്റുവാങ്ങി.
