തിരുവനന്തപുരം: പോയ വര്‍ഷം കലാലോകത്തോട് വിടപറഞ്ഞ ചലച്ചിത്ര പ്രതിഭകള്‍ക്ക് രാജ്യാന്തര മേളയില്‍ ആദരം. സംവിധായകരായ കെ ജി ജോര്‍ജ്, സിദ്ധിഖ്, കെപി ശശി, നടന്മാരായ ഇന്നസെന്റ്, മാമൂക്കോയ, നിര്‍മ്മാതാക്കള്‍ കെ രവീന്ദ്രന്‍, പി വി ഗംഗാധരന്‍, നിരൂപകനായിരുന്ന ഡെറിക് മാല്‍കം എന്നിവര്‍ക്കാണ് സ്മരണാഞ്ജലി അര്‍പ്പിച്ചത്.
ചടങ്ങില്‍ കെ എസ് എഫ് ഡി സി ചെയര്‍മാന്‍ ഷാജി എന്‍ കരുണ്‍ അധ്യക്ഷനായി. അക്കാദമി ചെയര്‍മാന്‍ രഞ്ജിത്ത്, ഫെസ്റ്റിവല്‍ ക്യുറേറ്റര്‍ ഗോള്‍ഡ സെല്ലം, നടന്‍ മുകേഷ്, സംവിധായകരായ ടി വി ചന്ദ്രന്‍, ജിയോ ബേബി, സിബി മലയില്‍, കമല്‍, ഫാദര്‍ ബെന്നി ബെനടിക്ട് എന്നിവര്‍ പങ്കെടുത്തു. തുടര്‍ന്ന് മണ്‍മറഞ്ഞ ചലച്ചിത്രപ്രതിഭകളുടെ സംഭാവനകള്‍ അടയാളപ്പെടുത്തി ചലച്ചിത്ര അക്കാദമി പ്രസിദ്ധീകരിച്ച ആറു പുസ്തകങ്ങള്‍ ചടങ്ങില്‍ പ്രകാശിപ്പിച്ചു.
കെ.ജി ജോര്‍ജിനെക്കുറിച്ച് ഡോ. ഷാഹിന കെ. റഫീഖ് എഡിറ്റ് ചെയ്ത ‘ഉള്‍ക്കടലിന്റെ ആഴക്കാഴ്ചകള്‍’, കെ.പി ശശിയെക്കുറിച്ച് മുസ്തഫ ദേശമംഗലം എഡിറ്റ് ചെയ്ത ‘മനുഷ്യാവകാശങ്ങളുടെ മൂന്നാം കണ്ണ്, താഹാ മാടായി എഡിറ്റ് ചെയ്ത ‘സിനിമാനാടന്‍ മാമുക്കോയ’, ഇന്നസെന്റിനെക്കുറിച്ച് അനില്‍കുമാര്‍ തിരുവോത്ത് എഡിറ്റ് ചെയ്ത ‘നര്‍മ്മരസതന്ത്രം’, സിദ്ദിഖിനെക്കുറിച്ച് ബെല്‍ബിന്‍ പി ബേബി എഡിറ്റ് ചെയ്ത ചിരിയുടെ ‘ഗോഡ്ഫാദര്‍’, ജനറല്‍ പിക്‌ചേഴ്‌സ് രവിയെക്കുറിച്ച് നീലന്‍ എഡിറ്റ് ചെയ്ത ‘നല്ല സിനിമ: ഒരു സമര്‍പ്പിത സഞ്ചാരം’ എന്നീ പുസ്തകങ്ങളാണ് ചടങ്ങില്‍ പുറത്തിറക്കിയത്. തുടര്‍ന്ന് കെ ജി ജോര്‍ജ്ജ് സംവിധാനം ചെയ്ത യവനിക പ്രദര്‍ശിപ്പിച്ചു.
