എഴുത്ത്, ചിത്രം / എം കെ രാമദാസ്
ദക്ഷിണേന്ത്യയില്‍ നിരവധി ജൈന സങ്കേതങ്ങളും വിവിധയിടങ്ങളിലായി ഏതാണ്ട് പത്തോളം മഠങ്ങളുമുണ്ട്. ഊട്ടിയിലെ കനകഗിരി, ഷിവമോഗയിലെ ഹുംച്ച, എന്‍ ആര്‍ പുര മഠങ്ങള്‍ , ധര്‍മ്മസ്ഥലയിലെയും മൂഡബ്രിദ്രയിലെയും ബസ്തികള്‍, അരഹന്ത ഗിരി, കമ്പതഹള്ളി എന്നിവിടങ്ങളിലെ മഠങ്ങള്‍ ,ഉത്തര കന്നഡയിലെ സോണ്ട ജൈന്‍ മഠം എന്നിവക്കൊപ്പം പ്രാധാന്യമുളളതാണ് ശ്രവണ ബെലഗോളയിലെ തീര്‍ത്ഥാടന കേന്ദ്രവും. മുന്നൂറോളം കുടുംബങ്ങളിലായുള്ള രണ്ടായിരത്തിലധികം ജൈന മതാനുയായികള്‍ ശ്രവണ ബെലഗോളയിലും പരിസരങ്ങളിലുമുണ്ട്. ഏതാണ്ട് മൂന്ന് മുതല്‍ നാല് ലക്ഷം വരെ സഞ്ചാരികള്‍ പ്രതിവര്‍ഷം ഇവിടെയെത്തുന്നുണ്ടെന്ന് ട്രസ്റ്റ് സെക്രട്ടറിയായ ഗുണപാല്‍ ജയിന്‍ പറഞ്ഞു. ‘ ഇവരില്‍ വിശ്വാസികളുടെ എണ്ണം വളരെ കുറവാണ്.
വിശ്വാസവുമായി ബന്ധപ്പെട്ടാണ് ഞങ്ങള്‍ ഈ കേന്ദ്രത്തിന് ദിവ്യത്വം കല്‍പിക്കുന്നത്. ശ്രവണ ബെലഗോളയിലെ മുഴുവന്‍ ജൈന വിശ്വാസികളും കൊല്ലത്തില്‍ ഒരു തവണയെങ്കിലും ഇവിടെയെത്തും. മാര്‍ച്ച് അവസാനമോ ഏപ്രില്‍ ആദ്യമോ ആണ് ഞങ്ങള്‍ മഹാവീര്‍ ജയന്തി ആഘോഷിക്കുന്നത്. ആ ദിവസം എല്ലാവരുമിവിടെ ഒത്ത്‌ചേരും.
പന്ത്രണ്ട് വര്‍ഷത്തിലാരിക്കല്‍ നടക്കുന്ന മഹാമസ്തകാഭിഷേക മാണ് ജൈന മത വിശ്വാസികളുടെ പ്രധാന ഒത്തുചേരലും ഉത്സവവും. ഏറ്റവും ഒടുവിലായി 2018 ലാണ് ഈ ചടങ്ങ് നടന്നത്. ലോകത്തെവിടെയുമുള്ള ജൈന ഭക്തര്‍ ഈ ചടങ്ങില്‍ എത്തിച്ചേരും.
ശ്വേതംബരര്‍, ദിഗംബരര്‍ എന്നിങ്ങനെ രണ്ട് ധാരയിലുള്ള ജൈന വിശ്വാസികളുണ്ട്. വാക്യാര്‍ത്ഥം സൂചിപ്പിക്കുന്നതു പോലെ ഒരു വിഭാഗം ശുഭ്ര വസ്ത്രധാരികളും മറ്റൊന്ന് വസ്ത്രത്തെ നിഷേധിക്കുന്നവരുമാണ്. ശ്രവണ ബെലഗോളയിലെ ജൈന വിശ്വാസികള്‍ ദിഗംബരരാണ്. ആചാര്യ വിദ്യാസാഗര്‍ മുനി മഹാരാജാണ് ദിഗംബര രുടെ ഇപ്പോഴത്തെ ആചാര്യന്‍. ശ്രവണ ബെലഗോളയിലെ ജൈന സമൂഹം ഏതാണ്ട് പൂര്‍ണമായി കച്ചവടത്തെ ആശ്രയിച്ചാണ് ജീവിതം മുന്നോട്ടു കൊണ്ടുപോവുന്നത്.
ഈ പ്രദേശത്തെ മറ്റ് വിഭാഗങ്ങളിലുള്ളവര്‍ കൃഷിയില്‍ താല്പര്യം പ്രകടിപ്പിക്കുമ്പോള്‍ ജൈനര്‍ മുഖം തിരിച്ചു നില്‍ക്കുകയാണെന്ന് ഗുണപാല്‍ ജയിന്‍ പറഞ്ഞു. ‘തുണിയും പല ചരക്കുമാണ് ഞങ്ങളുടെ ഇഷ്ട വില്പന വസ്തുക്കള്‍. ഇവിടുത്തെ ഏതാണ്ടെല്ലാ കുടുംബങ്ങളിലുമുളള ഒരംഗമെങ്കിലും കച്ചവടത്തിലുണ്ട്. അരിയുള്‍പ്പെടെയെല്ലാം വില കൊടുത്ത് വാങ്ങിയുപയോഗിക്കുകയാണ് ശീലം. പച്ചക്കറിയും പാലുമെല്ലാം ‘ . ‘സസ്യ ഭക്ഷണം മാത്രമേ ഞങ്ങള്‍ കഴിക്കു. പൂര്‍ണമായും സസ്യാഹാരികള്‍. ഞങ്ങളുടെ തലമുറയിലുള്ളവര്‍ വിദ്യാഭ്യാസത്തിന് പ്രാധാന്യം കൊടുത്തിരുന്നുവെങ്കിലും സര്‍ക്കാര്‍ ജോലിയെ മുഖ്യമായ ഒരു തൊഴിലായി പരിഗണിച്ചിരുന്നില്ല.
ഐ എ എസ്സ്, ഐ പി എസ് തലത്തിലുള്ള യോഗ്യതകളൊന്നും നേടാന്‍ ഞങ്ങളുടെ കുട്ടികള്‍ക്ക് കഴിഞ്ഞിട്ടില്ല. പുതുതലമുറയിത് തിരിച്ചറിഞ്ഞിട്ടുണ്ട്. പരിശീലന കേന്ദ്രങ്ങളുടെ അഭാവവും ഞങ്ങള്‍ക്ക് പ്രതികൂലമാണ്. കൃഷിയുടെ കാര്യവും തഥൈവ. ബെല്‍ഗാമിലെ ജൈന കുടുംബങ്ങള്‍ വലിയ കൃഷിക്കാരാണ്. കരിമ്പും ചെറുധാന്യമായ ജോഹറും ഇവര്‍ വന്‍തോതില്‍ വിളിയിക്കുന്നുണ്ട്. വയനാട്ടില്‍ ഞങ്ങളുടെ സഹോദരന്മാര്‍ സമ്പന്നരും രാഷ്ട്രീയ, സാമൂഹ്യശേഷിയുള്ള വരുമാണ്’.
ഗുണപാല്‍ ജെയിന്‍
ജൈന ജീവിതത്തെക്കുറിച്ചുള്ള ഗുണപാലിന്റെ വിശദീകരണത്തില്‍ ആകെ നിറഞ്ഞ് നിന്നത് സംതൃപ്തിയാണ്. ഒറ്റപ്പെട്ട ഒരു സംസ്‌കൃതി എന്ന നിലയില്‍ നിന്ന് പരസ്പരം ഇഴുകിച്ച ചേര്‍ന്ന കൂട്ടു ജീവിതാന്തരീക്ഷത്തിലേയ്ക്ക് ഇവര്‍ പരിവര്‍ത്തനം ചെയ്യപ്പെട്ടിട്ടുണ്ട്. പാരമ്പര്യവും വിശ്വാസവും മുറുകെ പിടിക്കുന്നുവെന്നവകാശപ്പെടുന്നുവെങ്കിലും ന്യൂജന വേറിട്ട് ചിന്തിക്കുകയും ജീവിക്കുകയും ചെയ്യുന്നു. ശ്രവണ ബെലഗോളയില്‍ നിന്ന് നൂറുകിലോമീറ്ററിനടുത്തുണ്ട് അടുത്ത ഉന്നമായ ഹളെബിഡുവിലേയ്ക്ക്. വിശാലമായ പാത. വഴിയോരത്തെ തീന്‍പുര തേടിയുള്ള അന്വേഷണം നീണ്ടുപോയി. വഴിവക്കില്‍ കാണുന്നതിലധികവും സസ്യഭക്ഷണശാലകളാണ്. ഞങ്ങള്‍ക്ക് വേണ്ടതോ മാംസാഹാരവും. ……..(തുടരും)
