സിനിമ വര്‍ത്തമാനം / എം കെ ഷെജിന്‍
കൊച്ചി: കന്യാസ്ത്രീയുടെ പ്രണയം എന്ന ടാഗ് ലൈനോടെവന്നു. ട്രെയിലെറും സോങ്ങും റിലീസ് ആയി, ഇതിനോടകം തന്നെ ശ്രദ്ധിക്കപ്പെട്ടുവെങ്കിലും സോഷ്യല്‍ മീഡിയയില്‍ വിവാദമായിരിക്കുകയാണ് നേര്‍ച്ചപ്പെട്ടി എന്ന ചിത്രം. ക്രൈസ്തവ സഭക്കെതിരെയാണ് ഈ ചിത്രം സംസാരിക്കുന്നത് എന്ന് ഊഹാപോഹങ്ങള്‍ ഉള്ളതിനാല്‍ പല ഭാഗത്തുനിന്നും സോഷ്യല്‍ മീഡിയ ആക്രമങ്ങള്‍ ചിത്രത്തിന് നേരെ വരുന്നുണ്ട്.
ചിത്രീകരണ സമയത്ത് തന്നെ വിവാദങ്ങള്‍ക്ക് തുടക്കം കുറിക്കുകയായിരുന്നു. ലൊക്കേഷനില്‍ എത്തിയ ഒരു സംഘം ആളുകള്‍ ചിത്രീകരണം തടസ്സപ്പെടുത്തുകയും കയ്യേറ്റ ശ്രമം നടത്തുകയുമായിരുന്നു. എതിര്‍പ്പുകളെ അവഗണിച്ചുകൊണ്ട് വര്‍ക്ക് പൂര്‍ത്തിയാക്കി ജൂലൈ 28ന് റിലീസിംഗ് ഡേറ്റ് നിശ്ചയിച്ചിരുന്നു എങ്കിലും ക്രിസ്ത്യന്‍ മേഖലകളില്‍ തിയേറ്ററുകള്‍ കിട്ടുന്നില്ല എന്നും ചിലബാഹ്യ ശക്തികള്‍ ഇടപെട്ട് തിയേറ്ററുക്കാരെ സ്വാധീനിച്ച് തീയറ്റര്‍ ബ്ലോക്ക് ചെയ്യാന്‍ ശ്രമിക്കുന്നുണ്ടെന്ന് പ്രൊഡ്യൂസര്‍ ആരോപിച്ചു. തൃശ്ശൂര്‍ കേന്ദ്രീകരിച്ചുള്ള സന്യസ്ത്വ സമൂഹം ചിത്രത്തിനെതിരെ ഇറക്കിയിട്ടുള്ള സോഷ്യല്‍ മീഡിയ കുറിപ്പുകള്‍ ഇതിനോടകം വൈറലായിരിക്കുകയാണ്. വിശ്വാസികളോട് ചിത്രത്തിനെതിരെ പ്രവര്‍ത്തിക്കുവാന്‍ ആഹ്വാനം ചെയ്യുന്ന രീതിയിലാണ് സോഷ്യല്‍ മീഡിയ കുറിപ്പ്.
വിവിധ മേഖലകളിലുള്ള പ്രചരണ ബോര്‍ഡുകള്‍ വ്യാപകമായി തകര്‍ക്കപ്പെട്ടിട്ടുണ്ട്. ചിത്രം റിലീസ് ചെയ്യാന്‍ സമ്മതിക്കില്ലെന്നും ചിത്രത്തിനെതിരെ വ്യാപകമായ രീതിയില്‍ പരാതികള്‍ പോകാന്‍ തയ്യാറെടുക്കുകയാണെന്നും ചില വിശ്വസ്ത ഇടങ്ങളില്‍ നിന്നും അറിവ് കിട്ടിയിട്ടുണ്ടന്നു പ്രൊഡ്യൂസര്‍ പറഞ്ഞു. ചിത്രത്തിന്റെ റിലീസ് അനിശ്ചിതാവസ്ഥയിലാണ്.
