കൊച്ചി: തിങ്കളാഴ്ച വൈകുന്നേരം പെരുമ്പാവൂരില്‍ നിന്ന് കാണാതായ രണ്ട് സ്‌കൂള്‍ വിദ്യാര്‍ത്ഥിനികളെ കണ്ടെത്തിയതായി സൂചന. വിദ്യാര്‍ത്ഥിനികളെ പാലക്കാട് നിന്ന് കണ്ടെത്തിയതായാണ് റിപ്പോര്‍ട്ട്. പെരുമ്പാവൂര്‍ ഗവ.ഗേള്‍സ് ഹയര്‍ സെക്കന്‍ഡറി സ്‌കൂളിലെ ഒന്‍പതാം ക്ലാസ് വിദ്യാര്‍ത്ഥിനികളായ അലേഖ (14,) നിഖില ലക്ഷ്മി (14) എന്നിവരെയാണ് കാണാതായിരുന്നത്.
പെരുമ്പാവൂര്‍ പാലക്കാട്ടുതാഴം ഒന്നാംമൈല്‍ സ്വദേശികളായ വിദ്യാര്‍ത്ഥിനികളെയാണ് കഴിഞ്ഞ ദിവസം മുതല്‍ കാണാതായത്. വിവരം ലഭിച്ചതിനെ തുടര്‍ന്ന് പെരുമ്പാവൂര്‍ പൊലീസ് പാലക്കാട്ടേക്ക് തിരിച്ചു. കാണാതായ വിദ്യാര്‍ത്ഥിനികള്‍ ഒരേ ക്ലാസിലായിരുന്നു പഠിച്ചിരുന്നത്. തിങ്കളാഴ്ച പതിവ് സമയം കഴിഞ്ഞും കുട്ടികള്‍ വീട്ടിലെത്താതിരുന്നതോടെ കുടുംബാംഗങ്ങള്‍ പെരുമ്പാവൂര്‍ പൊലീസില്‍ പരാതി നല്‍കി. തുടര്‍ന്ന് നടത്തിയ അന്വേഷണത്തിലാണ് കുട്ടികളെ പാലക്കാട് നിന്ന് കണ്ടെത്തിയത്.
