കല്പറ്റ: അതിരില്ലാത്ത ആവേശത്തില്‍ പ്രവര്‍ത്തകര്‍ അണിനിരന്നതോടെ കല്പറ്റ ജനസാഗരമായി. മുമ്പൊന്നും കണ്ടിട്ടില്ലാത്തയത്രയും ജനമാണ് ഇത്തവണ രാഹുലിനെ നെഞ്ചിലേറ്റി കൊടും ചൂടത്തും നഗരത്തില്‍ ആവേശം വിതറുന്നത്. ആഘോഷത്തിമര്‍പ്പില്‍ വലിയ ആള്‍ക്കൂട്ടം അണിരന്നതോടെ കല്പറ്റ ഉത്സവത്തിമിര്‍പ്പിലായി.
വയനാട് പാര്‍ലമെന്റ് മണ്ഡലത്തിലെ ഏഴ് നിയോജകമണ്ഡലത്തില്‍ നിന്നും പ്രവര്‍ത്തകര്‍ കല്പറ്റയിലെത്തി. ഇതോടെ നഗരത്തിന് ഉള്‍ക്കൊള്ളാന്‍ കഴിയുന്നതിലപ്പുറമായി. പ്രവര്‍ത്തകരെ അണി നിരത്തി ശക്തി തെളിയിക്കുക എന്ന ലക്ഷ്യം യു ഡി എഫ് നിറവേറ്റി.
കൊടി തോരണങ്ങളില്ലാതെ രാഹുലിന്റെ ചിത്രം മാത്രം കയ്യിലേന്തിയാണ് പ്രവര്‍ത്തകര്‍ അണിനിരന്നത്. വര്‍ണ ബലൂണുകളും കാവടിയാട്ടം, ചെണ്ടമേളം തുടങ്ങി വര്‍ണശബളമായ റോഡ് ഷോ കാണാന്‍ റോഡിനിരുവശവും സമീപത്തെ കെട്ടിടങ്ങളിലുമെല്ലാം ജനം അണിനിരന്നിരുന്നു.
