കല്പറ്റ: അമിത വേഗതയില്‍ പാഞ്ഞെത്തിയ കാറിടിച്ച് ബൈക്ക് യാത്രക്കാരനായ യുവാവിന് പരുക്ക്. ഇന്ന് പുലര്‍ച്ചെ 5.40നാണ് കല്പറ്റ മലബാര്‍ ജ്വല്ലറിക്ക് സമീപം അപകടം നടന്നത്. റോംഗ് സൈഡിലൂടെ പാഞ്ഞെത്തിയ കാറാണ് യുവാവ് സഞ്ചരിച്ചിരുന്ന ബൈക്ക് ഇടിച്ച് തെറിപ്പിച്ചത്. അപകട ശേഷവും കാര്‍ നിര്‍ത്താന്‍ തയ്യാറാകാതെ മുന്നോട്ടെടുത്തപ്പോള്‍ സമീപത്തുണ്ടായിരുന്നവര്‍ ബഹളം കൂട്ടുകയായിരുന്നു. ഇതോടെയാണ് കാര്‍ നിര്‍ത്തിയത്.
കാറിന്റെ ഡ്രൈവര്‍ മദ്യപിച്ചിരുന്നുവെന്ന് അപകട സ്ഥലത്തെത്തിയവര്‍ പറയുന്നു. അപകട ശേഷം ഇവിടെ എത്തിയ ആളുകളോട് സംസാരിക്കാനോ എഴുന്നേറ്റ് നില്‍ക്കാന്‍ പോലുമോ ആകാത്ത അവസ്ഥയിലായിരുന്നു ഡ്രൈവര്‍. കാറില്‍ മദ്യ കുപ്പി ഉണ്ടായിരുന്നതായും അപകട സ്ഥലത്തുണ്ടായിരുന്നവര്‍ പറയുന്നു. വിവരമറിഞ്ഞ് പൊലീസ് സ്ഥലത്തെത്തി.
