കോഴിക്കോട്: പ്രസവ ശസ്ത്രക്രിയക്കിടെ കത്രിക വയറ്റില്‍ കുടുങ്ങി അഞ്ച് വര്‍ഷമായി ദുരിതമനുഭവിക്കുന്ന ഹര്‍ഷിന എന്ന സ്ത്രീക്ക് മതിയായ നഷ്ടപരിഹാരം സര്‍ക്കാര്‍ നല്‍കണമെന്ന് വനിതാ കമ്മീഷന്‍ അധ്യക്ഷ പി സതീദേവി. ഹര്‍ഷിനക്കെതിരെ നടന്നത് മെഡിക്കല്‍ കുറ്റകൃത്യമാണ്. അതിന് ഉത്തരവാദികളായവരാണ് നഷ്ടപരിഹാരം നല്‍കേണ്ടതെന്നും വനിതാ കമ്മീഷന്‍ പറഞ്ഞു. ഹര്‍ഷിനയ്ക്ക് വനിതാ കമ്മിഷന്‍ എല്ലാ പിന്തുണയും നല്‍കും. ലീഗല്‍ സര്‍വീസ് അതോറിറ്റിയുടെ നിയമസഹായം ലഭ്യമാക്കാനും സഹായിക്കും.
അതേസമയം വയറ്റില്‍ കത്രിക കുടുങ്ങിയ സംഭവത്തില്‍ ആരോഗ്യമന്ത്രി നല്‍കിയ ഉറപ്പ് പാലിക്കാതെ വന്നതോടെ ഹര്‍ഷിന രണ്ടാം ഘട്ട സമരത്തിലേക്ക് കടന്നിരിക്കുകയാണ്. 50 ലക്ഷം രൂപ നഷ്ടപരിഹാരം ലഭ്യമാക്കുക, ആരോഗ്യ മന്ത്രി നല്‍കിയ ഉറപ്പുകള്‍ പാലിക്കുക, കുറ്റക്കാരായവരെ നിയമത്തിന് മുന്നില്‍ കൊണ്ടുവരിക എന്നീ ആവശ്യങ്ങള്‍ ഉന്നയിച്ചാണ് ഹര്‍ഷിനയുടെ സമരം.
കോഴിക്കോട് മെഡിക്കല്‍ കോളേജ് ആശുപത്രിക്ക് മുന്നിലാണ് സമരം. സംഭവത്തില്‍ ആരംഭിച്ച ആഭ്യന്തര അന്വേഷണം എങ്ങും എത്തിയില്ലെന്ന് ഹര്‍ഷിന ആരോപിച്ചിരുന്നു. സ്ത്രീയാണ് അമ്മയാണ്, താന്‍ കൂടെയുണ്ടാകുമെന്ന് ആരോഗ്യമന്ത്രി പറഞ്ഞു. എന്നാല്‍ മന്ത്രി ഉറപ്പുകള്‍ പാലിച്ചില്ലെന്നാണ് ഹര്‍ഷിന പറയുന്നത്. തനിക്ക് സര്‍ക്കാര്‍ പ്രഖ്യാപിച്ചിരിക്കുന്ന നഷ്ടപരിഹാരം അപര്യാപ്തമാണെന്നും ആവശ്യങ്ങളെല്ലാം അംഗീകരിക്കുന്നത് വരെ സമരം തുടരുമെന്നുമാണ് ഹര്‍ഷിന പറയുന്നത്.
