നിങ്ങള്‍ക്കും വാര്‍ത്തകളയക്കാം. 8289857951 എന്നതാണ് വാട്‌സാപ്പ് നമ്പര്‍.
തൃശൂര്‍: വീടിന്റെ ടെറസില്‍ ഇടക്ക് പരിശോധന നടത്തുന്നത് നല്ലതായിരിക്കും. ടെറസിന് മുകളില്‍ ആരെങ്കിലും കഴിയുന്നുണ്ടോ എന്ന് ഇത്തരം പരിശോധനയില്‍ കണ്ടെത്താം. വീട്ടുകാരറിയാതെ ടെറസിന് മുകളില്‍ രണ്ടു ദിവസമാണ് യുവാവ് കഴിഞ്ഞത്.
തൃശൂര്‍ വടക്കാഞ്ചേരി പടിഞ്ഞാറ്റ് മുറിയിലാണ് ഈ സംഭവം. പടിഞ്ഞാറ്റ് മുറിയില്‍ സായ്ഹൗസില്‍ വിജയ കൃഷ്ണന്റെ വീടിന്റെ ടെറസില്‍ കയറിക്കൂടിയ യുവാവ് വീട്ടുകാരറിയാതെ രണ്ട് ദിവസമാണ് കഴിഞ്ഞത്. യുവാവിനെ പിന്നീട് നാട്ടുകാരുടെ സഹായത്തോടെ സാഹസികമായി പിടികൂടി. തിരുവല്ല സ്വദേശി പ്രശാന്ത് എന്ന യുവാവിനെയാണ് പിടികൂടി പൊലീസില്‍ ഏല്‍പ്പിച്ചത്.
യുവാവ് ലഹരിക്കടിമയാണെന്ന സംശയമുണ്ട്. മോഷണത്തിനായി തക്കം പാര്‍ത്തിരുന്നതാണോ എന്നും സംശയിക്കുന്നുണ്ട്. ശനിയാഴ്ച ഉച്ച മുതലാണ് ഇയാളുടെ സാന്നിധ്യം വീട്ടുകാരുടെ ശ്രദ്ധയില്‍ പെടുന്നത്. ജോലിക്കാരിയാണ് വീട്ടുകാരോട് ഇക്കാര്യം പറയുന്നത്. എന്നാല്‍ തുടര്‍ന്ന് നടത്തിയ തെരച്ചിലില്‍ ആരെയും കണ്ടെത്തിയില്ല. ഞായറാഴ്ച രാവിലെ വീട്ടുടമ പ്രസീതയും ടെറസിന് മുകളില്‍ ഒരാളെ കാണുകയായിരുന്നു. തുടര്‍ന്നാണ് നാട്ടുകാരുടെ സഹായത്തോടെ പ്രശാന്തിനെ പിടികൂടി പൊലീസില്‍ ഏല്‍പ്പിച്ചത്.
