കോഴിക്കോട്: പിറന്ന നാട്ടില്‍ നിലനില്‍പ്പിന്നായി പോരാടുന്ന ഫലസ്തീന്‍ ജനതയ്ക്ക് ഐക്യദാര്‍ഢ്യം പ്രഖ്യാപിച്ച് എം.എസ്.എം സംസ്ഥാന സമിതി കോഴിക്കോട് ബീച്ചില്‍ വിദ്യാര്‍ഥി വലയം തീര്‍ത്തു. ഫലസ്തീന്‍ ഇസ്രാഈല്‍ പ്രശ്‌നം പരിഹരിക്കുവാന്‍ യു.എന്‍ അടിയന്തിരമായി ഇടപെട്ടിട്ടില്ലെങ്കില്‍ ഗസ്സ മരണത്തുരുത്തായി മാറുമെന്ന് സ്റ്റുഡന്റ്‌സ് സര്‍ക്കിള്‍ അഭിപ്രായപ്പെട്ടു.
അന്താരാഷ്ട്ര തലത്തില്‍ സ്വീകരിക്കുന്ന യുദ്ധമര്യാദകള്‍ പോലും പാലിക്കാതെ പലായനം ചെയ്യുന്ന ജനങ്ങള്‍ക്കു മേല്‍ വരെ ബോംബ് വര്‍ഷിക്കുകയാണ് ഇസ്രാഈല്‍ ചെയ്യുന്നത്. വെള്ളവും ഭക്ഷണവും വൈദ്യുതിയും ലഭിക്കാതെ ഗസ്സയിലെ ജനങ്ങള്‍ തീര്‍ത്തും അപകടത്തിനു മുമ്പിലാണ്. ആശുപത്രികള്‍ വരെ അടച്ചു പൂട്ടുന്ന അവസ്ഥയുണ്ടായിട്ടും അന്താരാഷ്ട്ര മനുഷ്യാവകാശ സംഘടനകള്‍ ഇടപെടാതിരിക്കുന്നത് തീര്‍ത്തും അപലപനീയമാണെന്നും അടിയന്തിര ഇടപെടലുകള്‍ ആവശ്യമാണെന്നും സ്റ്റുഡന്റ്‌സ് സര്‍ക്കിള്‍ ആവശ്യപ്പെട്ടു.
സ്റ്റുഡന്റ്‌സ് സര്‍ക്കിള്‍ റിഹാസ് പുലാമന്തോള്‍ ഉദ്ഘാടനം ചെയ്തു. സംഗമത്തെ അഭിംസബോധന ചെയ്ത് കൊണ്ട് എം എസ് എം സംസ്ഥാന ജനറല്‍ സെക്രട്ടറി ആദില്‍ നസീഫ് മങ്കട, ട്രഷറര്‍ ജസിന്‍നജീബ്, അഡ്വ.നജാദ് കൊടിയത്തൂര്‍,സിപി അബ്ദുസ്സമദ്, ഫഹീം പുളിക്കല്‍, ഡാനിഷ് അരീക്കോട്, താഹതമീം, തുടങ്ങിയവര്‍ സംസാരിച്ചു.
