തെലുങ്ക് ഹിറ്റ് സംവിധായകന്‍ വെങ്കി അറ്റ്‌ലൂരി ചിത്രത്തില്‍ ധനുഷ്; ഹിറ്റടിക്കാന്‍ ‘വാത്തി’ എത്തുന്നു

കൊച്ചി: സമകാലീന തമിഴ് നടന്മാരില്‍ ഏറെ വേറിട്ട കഥാപാത്ര തെരഞ്ഞെടുപ്പുകള്‍ കൊണ്ട് ശ്രദ്ധ നേടിയ നടനാണ് ധനുഷ്. ധനുഷിന്റെ ഈ വര്‍ഷത്തെ ആദ്യത്തെ റിലീസായെത്തുകയാണ് താരം അധ്യാപക വേഷത്തിലെത്തുന്ന ‘വാത്തി’. മലയാളിയായ സംയുക്തയാണ് സിനിമയിലെ നായിക. സമുദ്രക്കനിയാണ് പ്രതിനായക വേഷത്തിലുള്ളത്. സിനിമയുടേതായി പുറത്തിറങ്ങിയ ട്രെയിലറും ഗാനങ്ങളുമൊക്കെ ഇതിനകം വലിയ പ്രതീക്ഷ സമ്മാനിക്കുന്നതാണ്. ഫെബ്രുവരി 17നാണ് തമിഴിലും തെലുങ്കിലുമായി സിനിമയുടെ വേള്‍ഡ് വൈഡ് റിലീസ്.

കഥാപാത്ര വൈവിദ്ധ്യം കൊണ്ട് ഓരോ സിനിമയിറങ്ങുമ്പോഴും ഞെട്ടിക്കാറുള്ളയാളാണ് ധനുഷ്. കഴിഞ്ഞ വര്‍ഷം ധനുഷും നിത്യയും പ്രധാന വേഷങ്ങളിലെത്തിയ തിരുച്ചിറ്റമ്പലം നൂറ് കോടിക്ക് മേല്‍ ബോക്‌സോഫീസ് കളക്ഷന്‍ നേടി വന്‍ വിജയം നേടിയിരുന്നു. അതിന് ശേഷമിറങ്ങിയ സിനിമയായിരുന്നു ‘നാനേ വരുവേന്‍’. ധനുഷ് ഡബിള്‍ റോളിലെത്തിയ സിനിമ പക്ഷേ പ്രതീക്ഷിച്ച വിജയം നേടിയില്ല. ഈ ക്ഷീണം മാറ്റാന്‍ കൂടിയാണ് ഈ വര്‍ഷം ‘വാത്തി’യുമായി ധനുഷിന്റെ വരവ്. ചിത്രം ബ്ലോക്!ബസ്റ്റര്‍ ആകാനുള്ള എല്ലാ സാധ്യതയും ഉണ്ടെന്നാണ് ആരാധകരും നോക്കികാണുന്നത്.

ധനുഷിന്റെ വേറിട്ട മേക്കോവറും ശക്തമായ കഥയും അവതരണവും വാത്തിയെ മാസ് ആന്‍ഡ് ക്ലാസ് സിനിമയാക്കിയിട്ടുണ്ടെന്നാണ് സിനിമയുടെ പ്രീമിയര്‍ ഷോ കണ്ടവരുടെ പ്രതികരണങ്ങള്‍. തമിഴില്‍ ‘വാത്തി’ എന്ന പേരിലും തെലുങ്കില്‍ ‘സര്‍’ എന്ന പേരിലുമാണ് ചിത്രമെത്തുന്നത്. ബാലമുരുകന്‍ എന്നാണ് വാത്തിയില്‍ ധനുഷ് അവതരിപ്പിക്കുന്ന കഥാപാത്രത്തിന് പേര്. തെലുങ്കില്‍ ഒട്ടേറെ ഹിറ്റ് സിനിമകള്‍ ഒരുക്കിയിട്ടുള്ള വെങ്കി അറ്റ്!ലൂരിയൊരുക്കിയ ചിത്രം വിദ്യാഭ്യാസ കച്ചവടം പ്രമേയമാക്കി ശക്തമായൊരു കഥയുടെ പിന്‍ബലവുമായാണ് എത്തുന്നത്. സ്‌കന്ദ സിനിമാസാണ് ഐന്‍സ്റ്റീന്‍ മീഡിയയുമായി ചേര്‍ന്ന് ‘വാത്തി’ കേരളത്തില്‍ പ്രദര്‍ശനത്തിന് എത്തിക്കുന്നത്. കേരളത്തിലെ 100ഓളം തീയേറ്ററുകളില്‍ ‘വാത്തി’ പ്രദര്‍ശനത്തിനെത്തുന്നുണ്ട്.

സിനിമയുടെ തമിഴ്‌നാട്ടിലെ തിയറ്റര്‍ അവകാശം സെവന്‍ സ്‌ക്രീന്‍ സ്റ്റുഡിയോ സ്വന്തമാക്കിയിരിക്കുന്നത്. സിത്താര എന്റര്‍ടെയ്ന്‍മെന്റ്‌സും ഫോര്‍ച്യൂണ്‍ ഫോര്‍ സിനിമാസും ചേര്‍ന്ന് നിര്‍മ്മിച്ചിരിക്കുന്നതാണ് ഈ തമിഴ്‌തെലുങ്ക് ദ്വിഭാഷാ ചിത്രം. സായ് കുമാര്‍, തനിക്കെല്ല ഭരണി, സമുദ്രക്കനി, സംയുക്ത, തോട്ടപ്പള്ളി മധു, ആടുകളം നരേന്‍, ഇളവരശു തുടങ്ങി നിരവധി താരങ്ങളും വാത്തിയില്‍ അഭിനയിക്കുന്നു.

ധനുഷ് എഴുതിയ വാ വാത്തി എന്ന ഗാനം ചിത്രത്തിലേതായി വന്‍ ഹിറ്റായി ഇതിനകം മാറിയിട്ടുമുണ്ട്. ജി വി പ്രകാശ് കുമാറാണ് ചിത്രത്തിന്റെ സംഗീത സംവിധാനം നിര്‍വഹിച്ചിരിക്കുന്നത്. ചിത്രത്തിന്റെ ഓഡിയോ റൈറ്റ്!സ് ആദിത്യ മ്യൂസികിനാണ്. വംശി എസും സായ് സൗജന്യയും ചേര്‍ന്നാണ് ‘വാത്തി’ നിര്‍മിക്കുന്നത്. ജെ യുവരാജാണ് ക്യാമറ, നവീന്‍ നൂളി ആണ് ചിത്രസംയോജനം, വെങ്കട് ആണ് ആക്ഷന്‍ കോറിയോഗ്രാഫര്‍.