കോഴിക്കോട്: കോവൂരില്‍ കോഴിക്കോട് കോര്‍പ്പറേഷന്‍ 14 കോടി രൂപ ചിലവാക്കി ഉണ്ടാക്കിയ കമ്മ്യൂണിറ്റി ഹാളിന്റെ നിര്‍മ്മാണവുമായി ബന്ധപ്പെട്ട് നടന്നിട്ടുള്ള അഴിമതിയെയും ക്രമക്കേടിനേയും സംബന്ധിച്ച് സമഗ്ര അന്വേക്ഷണം നടത്തണമെന്ന് ബി ജെ പി ജില്ലാ പ്രസിഡന്റ് അഡ്വ: വി കെ സജീവന്‍ ആവശ്യപ്പെട്ടു. ബി.ജെ. പി പുതിയറ മണ്ഡലം കമ്മിറ്റി നേതൃത്ത്വത്തില്‍ നടത്തിയ ജനകീയ ധര്‍ണ്ണ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കഴിഞ്ഞ മാസം 23ന് മുഖ്യമന്ത്രി ഉദ്ഘാടനം നിര്‍വ്വഹിച്ച ഹാള്‍ ഒരു മാസം പിന്നിടുമ്പോള്‍ ചുറ്റുമതിലും കോര്‍ട്യാര്‍ടും ഉള്‍പ്പെടെ പല ഭാഗങ്ങളും തകര്‍ന്നു വീഴുകയാണ്. നിലവില്‍ ഇതുവരെ ഒരുപ്രോഗ്രാമിനു പോലും ഹോള്‍ അനുവദിച്ചിട്ടില്ല. ഉദ്ഘാടനത്തിന് മുമ്പ് തിടുക്കപ്പെട്ട് പണികള്‍ പൂര്‍ത്തിയാക്കിയപ്പോള്‍ പല പ്രവൃത്തിയിലും കൃത്രിമം കാണിച്ചിരിക്കുകയാണ്. ചുറ്റുമതില്‍ പൊളിഞ്ഞു വീണത് കാരണമാണ് ഉപയോഗിച്ച വസ്തുക്കള്‍ നേരില്‍ കാണാന്‍ ജനങ്ങള്‍ക്ക് സാധിച്ചത്. പൊതുവിപണിയില്‍ ഏറ്റവും ഗുണമേന്മ കുറഞ്ഞ വസ്തുക്കളാണ് നിര്‍മ്മാണത്തിനായ് ഉപയോഗിച്ചിരിക്കുന്നത്. കോര്‍പ്പറേഷനും കരാര്‍ കമ്പനിയും തമ്മില്‍ ധാരണയില്‍ നടത്തിയ അഴിമതിയില്‍ സമഗ്രമായ അന്വേഷണം നടത്തി ജനങ്ങളെ സത്യാവസ്ഥ ബോധ്യപ്പെടുത്തേണ്ടത് അനിവാര്യമാണെന്നും ധര്‍ണ്ണ ഉദ്ഘാടനം ചെയ്തുകൊണ്ട് വി കെ സജീവന്‍ ആവിശ്യപ്പെട്ടു. ധര്‍ണ്ണയില്‍ മണ്ഡലം പ്രസിഡന്റ് ടി പി ദിജില്‍ അദ്ധ്യക്ഷത വഹിച്ചു. കൗണ്‍സിലര്‍മാരായ ടി രനീഷ്, അനുരാധാതായാട്ട്, എന്‍ ശിവ പ്രസാദ്, സി എസ് സത്യഭാമ, സരിത പറയേരി, ജില്ലാ കമ്മിറ്റി അംഗം അഡ്വ: പുഷ്‌പോധരന്‍, മണ്ഡലം ഭാരവാഹികള്‍ രാധാകൃഷ്ണന്‍, ബൈജു ടി എം, മോഹനന്‍ പാലോത്ത്, സൂരജ് ചമ്പയില്‍, വിവേക് കുന്നത്ത്, സുജീഷ് തണല്‍ ഏരിയാ പ്രസിഡന്റ് സി പി. ഗണേഷന്‍, ജന: സെക്രട്ടറി പ്രമോദ് പുതുക്കുടി എന്നിവര്‍ നേതൃത്വം നല്‍കി.
