നോയിഡ: കാറിന് തീപിടിച്ച് രണ്ട് സുഹൃത്തുക്കള്‍ വെന്തുമരിച്ചു. നോയിഡയിലെ സെക്ടര്‍ 119ല്‍ കഴിഞ്ഞ ദിവസം പുലര്‍ച്ചെയായിരുന്നു അപകടം. സെക്ടര്‍ 53ല്‍ താമസിക്കുന്ന വിജയ് (27), അനസ് (27) എന്നിവരാണ് മരിച്ചത്. ഇരുവരും ബാല്യകാല സുഹൃത്തുക്കളാണ്. ഒരു സുഹൃത്തിന്റെ ജന്മദിനാഘോഷത്തില്‍ പങ്കെടുത്ത ശേഷം മടങ്ങിവരികയായിരുന്നു ഇവര്‍. തീപിടിച്ചപ്പോള്‍ കാറില്‍ നിന്ന് പുറത്തിറങ്ങാനാവാതെ ഇവര്‍ കുടുങ്ങിപ്പോവുകയായിരുന്നു. കാറിലെ എ സിയിലുണ്ടായ ഷോര്‍ട്ട് സര്‍ക്യൂട്ടാണ് തീപിടുത്തത്തിന് കാരണമായതെന്ന് സംശയിക്കുന്നതായി ഫയര്‍ഫോഴ്‌സ് ഉദ്യോഗസ്ഥര്‍ പറഞ്ഞു.
ഒരു ഹൗസിങ് സൊസൈറ്റിയുടെ ഗേറ്റിന് സമീപം രാവിലെ 6.08ന് കാര്‍ നിര്‍ത്തുന്നത് സിസിടിവി ക്യാമറയില്‍ കാണാം. ഏതാനും മിനിറ്റുകള്‍ അങ്ങനെ നിന്ന ശേഷം കാറിന് പെട്ടെന്ന് തീപിടിക്കുന്നു. തണുപ്പ് കാലം കൂടി ആയതിനാല്‍ പുലര്‍ച്ചെ റോഡില്‍ ആരും ഉണ്ടായിരുന്നില്ല. രാവിലെ 6.25ഓടെ കാറിന് തീപിടിച്ച സ്ഥലത്തിന് തൊട്ടടുത്തുള്ള ഹൗസിങ് സൊസൈറ്റിയിലെ സെക്യൂരിറ്റി ഗാര്‍ഡാണ് ഫയര്‍ ഫോഴ്‌സിനെ വിളിച്ചത്. ഫയര്‍ ഫോഴ്‌സ് സംഘം ഉടന്‍ തന്നെ സ്ഥലത്തെത്തി തീ നിയന്ത്രണ വിധേയമാക്കി. എന്നാല്‍ കാറില്‍ ഉണ്ടായിരുന്നവര്‍ മരിച്ചിരുന്നു.
