തിരുവനന്തപുരം: ഇന്ന് രാത്രി ആകാശത്തിലേക്ക് നോക്കിയാല്‍ സ്‌ട്രോബറി നിറത്തിലുള്ള പൂര്‍ണ ചന്ദ്രനെ കാണാം. ജൂണ്‍ 21ന് രാത്രി 7:08ന് സ്‌ട്രോബറി മൂണ്‍ പ്രത്യക്ഷപ്പെടുമെന്ന് ശാസ്ത്രജ്ഞര്‍ പറയുന്നു. വാനനിരീക്ഷണം ഇഷ്ടമുള്ളവര്‍ക്ക് അത് ആസ്വദിക്കാനുളള അവസരമാണ് ലഭിക്കുന്നത്.
സ്‌ട്രോബറിയുടെ നിറത്തില്‍ പ്രത്യക്ഷപ്പെടുന്ന ചന്ദ്രനെയാണ് സ്‌ട്രോബറി മൂണ്‍ എന്ന് വിശേഷിപ്പിക്കുന്നത്. വടക്കുകിഴക്കന്‍ അമേരിക്കയിലെ ഗോത്രവര്‍ഗങ്ങളില്‍ നിന്നാണ് ജൂണ്‍ മാസത്തില്‍ ഇത്തരത്തില്‍ നിറഭേദത്തോടെ പ്രത്യക്ഷപ്പെടുന്ന ചന്ദ്രന് സ്‌ട്രോബറി മൂണ്‍ എന്ന പേര് ലഭിച്ചത്. വസന്തകാലത്തെ വരവേല്‍ക്കുന്നതിനായി പൂക്കള്‍ വിരിഞ്ഞു തുടങ്ങുന്നതും ഫലവര്‍ഗങ്ങള്‍ വിളവെടുപ്പിന് പാകപ്പെടുന്നതുമായ സമയത്താണ് ഇത്തരത്തില്‍ സ്‌ട്രോബറിയുടെ നിറത്തോടെയുളള അമ്പിളിക്കല ഗോത്രവര്‍ഗക്കാരുടെ ശ്രദ്ധയില്‍പ്പെട്ടത്. പിന്നീട് അവര്‍ക്കിടയില്‍ അത് സ്‌ട്രോബറി മൂണ്‍ എന്ന് അറിയപ്പെടുകയായിരുന്നു.
എന്നാല്‍ ചക്രവാളത്തോട് ചന്ദ്രന് അടുക്കുമ്പോള്‍ പ്രകാശ രശ്മികള്‍ അന്തരീക്ഷത്തിലെ സാന്ദ്രത കൂടിയ പാളികളിലൂടെ കടന്നു പോകുമ്പോഴാണ് ഇത്തരത്തില്‍ ചുവന്ന നിറത്തില്‍ കാണപ്പെടുന്നതെന്നാണ് ശാസ്ത്രജ്ഞര്‍ അഭിപ്രായപ്പെടുന്നത്.
