കോഴിക്കോട്: 145 തീര്‍ത്ഥാടകരുമായി കരിപ്പൂരില്‍ നിന്നുള്ള ആദ്യ ഹജ്ജ് വിമാനം ഇന്ന് പുലര്‍ച്ചെ പുറപ്പെട്ടു. പുലര്‍ച്ചെ 4.25 നാണ് തീര്‍ത്ഥാടകരുമായി വിമാനം പറന്നത്. സംസ്ഥാന ന്യൂനപക്ഷ ക്ഷേമ, കായിക, വഖഫ്, ഹജ്ജ് തീര്‍ത്ഥാടന വകുപ്പ് മന്ത്രി വി അബ്ദുറഹ്മാന്‍ ഫ്‌ളാഗ് ഓഫ് ചെയ്തു. എം പി മാരായ എം പി അബ്ദുസ്സമദ് സമദാനി, എം കെ രാഘവന്‍, ടി വി ഇബ്രാഹീം എം എല്‍ എ, സംസ്ഥാന ഹജ്ജ് കമ്മിറ്റി ചെയര്‍മാന്‍ സി മുഹമ്മദ് ഫൈസി, അംഗങ്ങളായ കെ ഉമര്‍ ഫൈസി മുക്കം, അഡ്വ. പി മൊയ്തീന്‍ കുട്ടി, മുഹമ്മദ് ഖാസിം കോയ , ഡോ. ഐ പി അബ്ദുസലാം, സഫര്‍ കയാല്‍, പി ടി അക്ബര്‍, എക്‌സിക്യൂട്ടീവ് ഓഫീസര്‍ പി എം ഹമീദ്, അസിസ്റ്റന്റ് സെക്രട്ടറി എന്‍ മുഹമ്മദലി, എയര്‍പോര്‍ട്ട് ഡയറക്ടര്‍ എസ് സുരേഷ്, ഹജ്ജ് സെല്‍ ഓഫീസര്‍ കെ കെ മൊയ്തീന്‍ കുട്ടി, ജില്ലാ ഇന്‍ഫര്‍മേഷന്‍ ഓഫീസര്‍ കെ മുഹമ്മദ് തുടങ്ങിയവര്‍ പങ്കെടുത്തു.
ആദ്യ ദിവസമായ ഇന്ന് കോഴിക്കോട് നിന്നും രണ്ട് വിമാനങ്ങളാണുള്ളത്. പുലര്‍ച്ചെ 4.25ന് ഐ എക്‌സ് 3031 നമ്പര്‍ വിമാനവും രാവിലെ 8.30 ന് ഐ എക്‌സ് 3021 നമ്പര്‍ വിമാനവും. ഓരോ വിമാനത്തിലും 145 പേരാണ് യാത്രയാവുക. ആദ്യ വിമാനത്തില്‍ 69 പുരുഷന്മാരും 76 സ്ത്രീകളും രണ്ടാമത്ത വിമാനത്തില്‍ 77 പുരുഷന്മാരും 68 സ്ത്രീകളുമാണുള്ളത്.
