പട്ടിക്കാട്: എം ഡി എം എ മലദ്വാരത്തില്‍ ഒളിപ്പിച്ച് കടത്തിയ എറണാകുളം സ്വദേശി പിടിയില്‍. വാതുരുത്തി നികര്‍ത്തില്‍ വീട്ടില്‍ വിനു(ആന്റണി-38) ആണ് 38.5 ഗ്രാം എം ഡി എം എയുമായി പോലീസിന്റെയും ലഹരിവിരുദ്ധ സ്‌ക്വാഡിന്റെയും പിടിയിലായത്. മണ്ണുത്തി-വടക്കഞ്ചേരി ദേശീയപാതയില്‍ മുടിക്കോടുവെച്ച് വാഹന പരിശോധനയ്ക്കിടെയാണ് ഇയാള്‍ പിടിയിലായത്.
ബെംഗളൂരുവില്‍നിന്ന് കെഎസ്ആര്‍ടിസി ബസില്‍ വരികയായിരുന്ന വിനു പോലീസിനെ കണ്ടതോടെ ഇയാള്‍ ശരീരക അസ്വസ്ഥത പ്രകടപ്പിച്ചു. തുടര്‍ന്ന് പൊലീസ് ഇയാളെ കസ്റ്റഡിയിലെടുക്കുകയും ആശുപത്രിയില്‍ പ്രവേശിപ്പിച്ച് പരിശോധന നടത്തുകയും ചെയ്തതോടെയാണ് മലദ്വാരത്തില്‍ ലഹരി വസ്തു കടത്തുന്നത് കണ്ടെത്തിയത്.
ഏഴ് സെന്റിമീറ്റര്‍ നീളത്തില്‍ പ്ലാസ്റ്റിക് കവറില്‍ പൊതിഞ്ഞ് ഇന്‍സുലേഷന്‍ ടേപ്പ് കൊണ്ട് ഒട്ടിച്ച നിലയിലാണ് എംഡിഎംഎ കണ്ടെത്തിയത്. നിരവധി ലഹരി കേസുകളിലെ പ്രതിയാണ് വിനു.
