കല്പറ്റ: കേരള ചിത്രകല പരിഷത്ത് വയനാട് ജില്ലാ കമ്മിറ്റിയുടെ ആഭിമുഖ്യത്തില്‍ സംഘടിപ്പിച്ച ചിത്ര ജാലകം ചിത്രപ്രദര്‍ശനം എന്‍ എം ഡി സി ഹാളില്‍ പ്രദര്‍ശന തുടങ്ങി. കല്പറ്റ നഗരസഭ സെക്രട്ടറി അലി അസ്‌കര്‍ ഉദ്ഘാടനം ചെയ്തു. കേരള ചിത്രകല പരിഷത്ത് സംസ്ഥാന ട്രഷറര്‍ ഷാജി പാമ്പള അധ്യക്ഷനായ യോഗത്തില്‍ പ്രഭകുമാര്‍, സൈനുദ്ദീന്‍ തുടങ്ങിയവര്‍ സംസാരിച്ചു. കെ. വി. ജയപ്രകാശ് സ്വാഗതവും പി. എന്‍. സതി ടീച്ചര്‍ നന്ദിയും പറഞ്ഞു.
ജെയിംസ് കല്‍പ്പറ്റ, പി എന്‍ സതി ടീച്ചര്‍, ഡോക്ടര്‍ ഷാജുനീസ തുടങ്ങിയവരുടെ ചിത്രങ്ങളാണ് പ്രദര്‍ശനത്തിലുള്ളത്. ജലച്ചായത്തിലും ആക്രലിക്കിലും വരച്ച നൂറോളം ചിത്രങ്ങള്‍ പ്രദര്‍ശനത്തിലുണ്ട്. വയനാടിന്റെ പ്രകൃതി ദൃശ്യങ്ങള്‍, മ്യൂറല്‍ ചിത്രങ്ങള്‍ തുടങ്ങിയവയും പ്രദര്‍ശനത്തില്‍ ഉണ്ട്. ഈ മാസം എട്ടാം തീയതി ചിത്രപ്രദര്‍ശനം സമാപിക്കും.
