തിരുവനന്തപുരം: ലൈംഗീക അതിക്രമ കേസില്‍ ഹാസ്യതാരം ബിനു ബി കമല്‍ അറസ്റ്റില്‍. കെ എസ് ആര്‍ ടി സി ബസ്സിലെ യാത്രക്കിടെയാണ് ബിനു ബി കമല്‍ യുവതിക്ക് നേരെ ലൈംഗീക അതിക്രമം കാട്ടിയത്. ഇന്നലെ വൈകിട്ട് അഞ്ച് മണിയോടെയാണ് സംഭവം നടന്നത്. തിരുവനന്തപുരത്ത് നിന്നും നിലമേലിലേക്ക് യാത്ര ചെയ്യുകയായിരുന്ന യുവതിക്ക് നേരെയാണ് മോശം പെരുമാറ്റവും ലൈംഗീകാതിക്രമവും നടത്തിയത്. യുവതിയുടെ പരാതിയിലാണ് ടെലിവിഷന്‍ താരവും മിമിക്രി കലാകാരനുമായ ബിനു ബി കമാല്‍ (40) അറസ്റ്റിലായത്.
യാത്രക്കിടെ ബസ്സ് വട്ടപ്പാറ ഭാഗത്ത് എത്തിയപ്പോളാണ് തൊട്ടടുത്ത സീറ്റില്‍ ഇരിക്കുകയായിരുന്ന പ്രതി തന്നോട് അപമര്യാദയായി പെരുമാറിയെന്നാണ് യുവതിയുടെ പരാതിയില്‍ പറയുന്നത്. 21കാരിയായ കൊല്ലം കടയ്ക്കല്‍ സ്വദേശിനിയായ യുവതിയാണ് പരാതിക്കാരി. ശല്യം സഹിക്കവയ്യാതെ യുവതി ബഹളം വെച്ചതിനെ തുടര്‍ന്ന് വട്ടപ്പാറ ജംഗ്ഷനില്‍ ബസ് നിര്‍ത്തി. അപ്പോള്‍ പ്രതി ബസില്‍നിന്ന് ഇറങ്ങി ഓടി. സ്ഥലത്തെത്തിയ വട്ടപ്പാറ പൊലീസും യാത്രക്കാരും നാട്ടുകാരും ചേര്‍ന്ന് ശീമുളമുക്കില്‍ നിന്നാണ് പ്രതിയെ പിടികൂടിയത്.
