മലപ്പുറം: എം എസ് എം മലപ്പുറം വെസ്റ്റ് ജില്ലാ സമിതിയുടെ നേതൃത്വത്തില്‍ ഒക്ടോബര്‍ 23ന് തിങ്കളാഴ്ച കുറുക്കോള്‍ കുന്ന് വെച്ച് ‘കാലം തേടുന്ന അനിവാര്യത’ എന്ന പ്രമേയത്തില്‍ ജെന്‍ ലൈറ്റ് എന്ന പേരില്‍ വിദ്യാര്‍ത്ഥി സമ്മേളനം സംഘടിപ്പിക്കും. ധാര്‍മികതയുടെ പരിധികള്‍ ലംഘിച്ച് മൂല്യനിരാസത്തെ ആഘോഷമാക്കുന്ന പുതുതലമുറ സമൂഹത്തില്‍ വളര്‍ന്ന് കൊണ്ടിരിക്കുന്നു. മതനിരാസത്തിന്റെയും ലിബറലിസത്തിന്റെയും ലഹരികളുടേയും തേര്‍വാഴ്ചകളാണ് എവിടെയും കാണുന്നത്. ഭൗതീക ലോകം മലീമസമായിക്കൊണ്ടിരിക്കുന്ന സാഹചര്യത്തില്‍ നടത്തുന്ന ഈ വിദ്യാര്‍ത്ഥി സമ്മേളനത്തിന് വളരെ പ്രാധാന്യമുണ്ട് എന്ന് ഞങ്ങള്‍ മനസ്സിലാക്കുന്നു.
വിശ്വമാനവികതക്ക് വേദ വെളിച്ചം എന്ന പ്രമേയത്തില്‍ 2024 ജനുവരി 25 മുതല്‍ 28 വരെ കരിപ്പൂരില്‍ നടക്കുന്ന മുജാഹിദ് പത്താം സംസ്ഥാന സമ്മേളനത്തിന്റെ പ്രചരാണാര്‍ത്ഥം സംഘടിപ്പിക്കുന്ന വിദ്യാര്‍ത്ഥി സമ്മേളനം അഡ്വ. എന്‍. ഷംസുദ്ദീന്‍ എം.എല്‍ എ ഉദ്ഘാടനം ചെയ്യും. വിദ്യാഭ്യാസ വിദഗ്ധര്‍, മോട്ടിവേഷന്‍ സ്പീക്കേഴ്‌സ്, സാംസ്‌ക്കാരിക നായകര്‍ എന്നിവര്‍ സംബന്ധിക്കും. ജില്ലയിലെ വിവിധ ഭാഗങ്ങളിലെ ആയിരത്തോളം വിദ്യാര്‍ത്ഥി പ്രതിനിധികള്‍ പങ്കെടുക്കും.
പത്രസമ്മേളനത്തില്‍ എം എസ് എം ജില്ലാ പ്രസിഡന്റ് നുഅ്മാന്‍ ഷിബിലി കോട്ടക്കല്‍, സെക്രട്ടറി ഹാമിദ് സനീന്‍, മുഹ്‌സിന്‍ നെല്ലിക്കാട്, ഹിഷാം അബ്ദുല്‍ മജീദ്, ഫഹീം ചങ്ങരംകുളം, കെ എന്‍ എം ജില്ലാ ട്രെഷറര്‍ പാറപ്പുറത്ത് മുഹമ്മദ് കുട്ടി ഹാജി, കെ എന്‍ എം വൈസ് പ്രസിഡന്റ് സി എം പി മുഹമ്മദ് അലി എന്നിവര്‍ സംബന്ധിച്ചു.
