പനമരം: അഞ്ചാംമൈല്‍ ടൗണില്‍ കെട്ടിടത്തിനു മുകളില്‍അപകടഭീഷണി ഉയര്‍ത്തിനില്‍ക്കുന്ന മൊബൈല്‍ ടവര്‍ മാറ്റി സ്ഥാപിക്കണമെന്ന് എസ്.ഡി.പി.ഐ പനമരം പഞ്ചായത്ത് കമ്മിറ്റി ആവശ്യപ്പെട്ടു. കോഴിക്കോട് മാനന്തവാടി ദേശീയപാതയില്‍ മത്സ്യമാംസ മാര്‍ക്കറ്റുകളും വ്യാപാര സ്ഥാപനങ്ങളുമടങ്ങുന്ന തിരക്കേറിയ സ്ഥലത്താണ് ടവര്‍ സ്ഥാപിച്ച കെട്ടിടം സ്ഥിതി ചെയ്യുന്നത്. ടൗണിലെത്തുന്ന നിരവധി വാഹനങ്ങള്‍ കെട്ടിടത്തിനോട് ചേര്‍ന്നാണ് പാര്‍ക്ക് ചെയ്യാറുള്ളത്. ബലക്ഷയം ബാധിച്ചു തുടങ്ങിയ കെട്ടിടത്തിനു മുകളില്‍ നിര്‍മ്മാണ പ്രവൃത്തികള്‍ നടത്തുന്നതിന് പഞ്ചായത്ത് അധികൃതര്‍ നിരോധനമേര്‍പ്പെടുത്തിയിട്ടുണ്ട്. ജനങ്ങളുടെ ജീവനും തൊട്ടടുത്ത കെട്ടിടങ്ങള്‍ക്കും ഭീഷണിയായി നില്‍ക്കുമ്പോഴും മൊബൈല്‍ ടവറിന് വീണ്ടും വീണ്ടും അനുമതി പുതുക്കി നല്‍കുന്നത് ടവര്‍ കമ്പനികള്‍ക്ക് അധികൃതര്‍ നല്‍കുന്ന പരസ്യപിന്തുണയാണ് വ്യക്തമാക്കുന്നത്. ഇത് പൊതുസമൂഹത്തോടുള്ള വെല്ലുവിളിയാണ്.
ജനങ്ങളുടെ ജീവന് ഭീഷണിയായ മൊബൈല്‍ ടവര്‍എത്രയും വേഗം മാറ്റി സ്ഥാപിക്കാനുളളനടപടികള്‍ സ്വീകരിക്കണമെന്ന് ആവശ്യപ്പെട്ട് എസ്.ഡി.പി.ഐ പഞ്ചായത്ത് ഭാരവാഹികള്‍ പഞ്ചായത്ത് സെക്രട്ടറിക്ക് നിവേദനം നല്‍കിയിട്ടുണ്ടെന്നും നടപടികളുണ്ടായില്ലെങ്കില്‍ ശക്തമായ സമരപരിപാടികള്‍ക്ക് രൂപം നല്‍കുമെന്നും എസ് ഡി.പി.ഐ പനമരം പഞ്ചായത്ത് കമ്മറ്റി അറിയിച്ചു.
യോഗത്തില്‍ പ്രസിഡണ്ട് നിസാര്‍ എന്‍, സെക്രട്ടറി അസ്ലം എ, വൈസ് പ്രസിഡണ്ട് റഹീസ് പനമരം, കെ സുബൈര്‍ തുടങ്ങിയവര്‍ സംസാരിച്ചു.
