ആലപ്പുഴ: ഇസ്‌ലാഹി കേരളത്തിന്റെ ആത്മാഭിമാനമായ ആദര്‍ശ രംഗത്ത് കലര്‍പ്പില്ലാത്ത പ്രബോധനം നടത്തുന്ന ഐ എസ് എമ്മിന്റെ മുഖപത്രമായ ശബാബിന്റെ പ്രചാരണ പ്രവര്‍ത്തനങ്ങള്‍ക്ക് തുടക്കമായി. ഡിസംബര്‍ മാസം പ്രചാരണ മാസമായി ആചരിക്കുകയാണ്. പുതിയ വരിക്കാരെ ചേര്‍ത്ത് വിപുലമായ രീതിയില്‍ ജനങ്ങളിലേക്ക് എത്തിക്കുകയാണ് ലക്ഷ്യം. ഇതിന്റെ ഭാഗമായി ജില്ലയില്‍ പ്രചാരണ പരിപാടികള്‍ക്ക് തുടക്കമായി.
ആലപ്പുഴ വലിയകുളം മസ്ജിദ് റഹ്മയില്‍ ചേര്‍ന്ന കണ്‍വെന്‍ഷന്‍ കെ എന്‍ എം മര്‍ക്കസു ദ്ദ അവ ജില്ലാ വൈ. പ്രസിഡന്റ് പി. നസീര്‍ ഉദ്ഘാടനം ചെയ്തു. ഷെമീര്‍ ഫലാഹി അധ്യക്ഷത വഹിച്ച യോഗത്തില്‍ ആലപ്പുഴ ശബാബ്, വെളിച്ചം കോര്‍ഡിനേറ്റര്‍ അമീര്‍ ഹാദി ആമുഖ പ്രഭാഷണം നിര്‍വഹിച്ചു. ഐ എസ് എം സംസ്ഥാന സെക്രട്ടറി അയ്യൂബ് എടവനക്കാട് മുഖ്യപ്രഭാഷണം നിര്‍വഹിച്ചു. വളര്‍ന്നു വരുന്ന യുവ തലമുറക്ക് ദര്‍ശനം നല്‍കുകയും മത നിരാസം പ്രചരിപ്പിക്കുന്നവര്‍ക്ക് കാലഘട്ടത്തിന് അനുയോജ്യമായ മറുപടി നല്‍കി ആദര്‍ശ രംഗത്ത് ഉറച്ചു നില്‍ക്കുവാന്‍ ശബാബിന്റെ തൂലികക്ക് സാധിച്ചിട്ടുണ്ട് എന്നും അങ്ങനെ പറയാന്‍ ശബാബിനു മാത്രമേ കഴിയുകയുള്ളു എന്നും സൗത്ത് സോണ്‍ ട്രഷറര്‍ എ. പി. നൗഷാദ് പറഞ്ഞു.
ശാഖ തലങ്ങളില്‍ ശബാബിന്റെ പ്രചാരണം വ്യാപിപ്പിക്കുന്നതിന് ശാഖ ഭാരവാഹികളെ ചുമതലപ്പെടുത്തി. ചര്‍ച്ചയില്‍ പങ്കെടുത്തുകൊണ്ട് എം ജി എം സൗത്ത് സോണ്‍ പ്രസിഡന്റ് സഫല നസീര്‍, മണ്ഡലം പ്രസിഡന്റ് കലാമുദീന്‍, മണ്ഡലം സെക്രട്ടറി മുബാറക് അഹമ്മദ്, എം എസ് എം പ്രതിനിധി ഹിഷാം സിയാദ്, എസ്. എം. ഷെജീര്‍, ഗഫൂര്‍ റാവുത്തര്‍, ബഷീര്‍ സാഹിബ് തുടങ്ങിയവര്‍ സംസാരിച്ചു.
കെ എന്‍ എം ജില്ലാ സെക്രട്ടറി എ. പി. നൗഷാദിനെ ശബാബ് വരിക്കാരനായി ചേര്‍ത്ത് കൊണ്ട് ഐ എസ് എം സംസ്ഥാന സെക്രട്ടറി അയ്യൂബ് എടവനക്കാട് നിര്‍വഹിച്ചു. ആലപ്പുഴ മണ്ഡലം ശബാബ് പ്രചാരണത്തിന് തുടക്കം കുറിച്ച് മണ്ഡലം ട്രഷറര്‍ വൈ. ജഹാസിനെ വരിക്കാരനായി ചേര്‍ത്തുകൊണ്ട് ഷെമീര്‍ ഫലാഹി നിര്‍വഹിച്ചു.തുടര്‍ന്ന് ശബാബ് പോസ്റ്റര്‍ പ്രകാശനവും നടന്നു.
