സിനിമാവര്‍ത്തമാനം / ടി കെ ഉമ്മര്‍
(IFFI, IFFK വേദികളില്‍ കാഴ്ചക്കാരുടെ പ്രീതി പിടിച്ചുപറ്റിയ ആട്ടം എന്ന സിനിമയെക്കുറിച്ച് സാമൂഹ്യ നിരീക്ഷകനായ ടി കെ ഉമ്മര്‍ )
1982 ലാണ് യവനിക വരുന്നത്. കെ.ജി ജോര്‍ജിന്റെ കരിയറില്‍ വലിയ വിജയമായ സിനിമ. ഒരു നാടകട്രൂപ്പുമായി ബന്ധപ്പെട്ട കൊലയും കുറ്റാന്വേഷണവും ഉള്‍പ്പെട്ട ത്രില്ലര്‍. വേറെയും സിനിമകള്‍ നാടകത്തിന്റെ പശ്ചാത്തലത്തിലുണ്ടായിട്ടുണ്ട്. 2023 ലെ ഷിനോസ് റഹ്മാന്റെ ചവിട്ട് വളരെ ശ്രദ്ധേയമായ ചലച്ചിത്രമാണ്. എന്നാല്‍ ആട്ടം വേറൊരു ലവലാണ്. ആനന്ദ് ഏകര്‍ഷി ശരിക്കും ഞെട്ടിച്ചു. വല്ലാത്തൊരു പഹയന്‍! ആദ്യ സിനിമ തന്നെ എന്തൊരു സിനിമ ! ആളില്ലാതെ മാറിപ്പോകും എന്നു കരുതിയാണ് രണ്ടാം ദിവസം തന്നെ പോയത്. പക്ഷേ തിയറ്ററില്‍ പകുതിയിലധികം ആളുണ്ട്. ഇനിയും ആളുകള്‍ അറിഞ്ഞു വരിക തന്നെ ചെയ്യും. അത്രമേല്‍ ത്രില്ലിങ്ങാണ് ഈ സിനിമ. സുഹൃത്തുക്കള്‍ തീര്‍ച്ചയായും തിയ്യേറ്ററില്‍ നിന്നു തന്നെ കാണണം. വല്ലാത്തൊരു ആട്ടം തന്നെയാണത്. സിനിമ ഇഷ്ടപ്പെടുന്ന ഒരാളാണോ ? ഇത് കണ്ടില്ലെങ്കില്‍ നഷ്ടം നിങ്ങളുടേതാണ്. അതൊരു ചെറിയ നഷ്ടമാവില്ലെന്നു മാത്രം സൂചിപ്പിക്കട്ടെ.
