പൊടിമറ്റം: സെന്റ് മേരീസ് പള്ളിയിലെ വിശുദ്ധവാര തിരുകര്‍മ്മങ്ങള്‍ക്ക് മാര്‍ച്ച് 24 ഞായര്‍ രാവിലെ 6:30ന് ആരംഭിക്കുന്ന ഓശാന ഞായര്‍ ശുശ്രൂഷകളോടെ തുടക്കമാകും. തുടര്‍ന്ന് ഫാ. ജില്‍സണ്‍ മാത്യു കക്കാട്ടുപിള്ളി വി.സിയുടെ നേതൃത്വത്തില്‍ വൈകുന്നേരം 5:00 മുതല്‍ 9:00 വരെയുള്ള വചനപ്രഘോഷണവും പ്രാര്‍ത്ഥനാശുശ്രൂഷയും 27 ബുധനാഴ്ച സമാപിക്കും.
മാര്‍ച്ച് 28ന് പെസഹാ വ്യാഴത്തോടനുബന്ധിച്ച് രാവിലെ 8 മുതല്‍ ആരാധനയും വൈകുന്നേരം 4ന് പെസഹാ തിരുക്കര്‍മങ്ങളും നടത്തപ്പെടും. മാര്‍ച്ച് 29 ദുഃഖവെള്ളിയാഴ്ച രാവിലെ 9ന് പാറത്തോട് കുരിശടിയില്‍ നിന്നു പൊടിമറ്റം സെന്റ് മേരീസ് പള്ളിയിലേക്ക് കെ കെ റോഡിലൂടെ കുരിശിന്റെ വഴിയും തുടര്‍ന്ന് 10.30ന് ദുഃഖവെള്ളി തിരുക്കര്‍മങ്ങളും നടക്കും. ഏപ്രില്‍ 8ന് ദുഃഖശനി ശുശ്രൂഷകള്‍ രാവിലെ 6.30ന് ആരംഭിക്കും. മാര്‍ച്ച് 31ന് ഈസ്റ്റര്‍ ഞായറിന്റെ ഭാഗമായി പുലര്‍ച്ചെ 2.45ന് ഉയര്‍പ്പ് തിരുനാള്‍ തിരുകര്‍മ്മങ്ങള്‍ ആരംഭിക്കും. രാവിലെ 7: 15ന് വിശുദ്ധ കുര്‍ബാനയും അര്‍പ്പിക്കപ്പെടും. വിശുദ്ധവാര ശുശ്രൂഷകള്‍ക്ക് വികാരി ഫാ. മാര്‍ട്ടിന്‍ വെള്ളിയാംകുളം അസിസ്റ്റന്റ് വികാരി ഫാ. സില്‍വാനോസ് വടക്കേമംഗലം എന്നിവര്‍ നേതൃത്വം നല്‍കും.
ഏപ്രില്‍ 1 മുതല്‍ 6 വരെ ഉത്ഥാനോത്സവം. ഏപ്രില്‍ ഏഴിലെ പുതുഞായര്‍ ശുശ്രൂഷകള്‍ക്കും ആഘോഷമായ വിശുദ്ധ കുര്‍ബാനയ്ക്കും ബിഷപ്പ് മാര്‍ ജേക്കബ് മുരിക്കന്‍ മുഖ്യ കാര്‍മികത്വം വഹിക്കുമെന്ന് വികാരി ഫാ. മാര്‍ട്ടിന്‍ വെള്ളിയാംകുളം അറിയിച്ചു.
