കോഴിക്കോട്: പതിനായിരക്കണക്കിന് ഗൾഫ് യാത്രക്കാരടക്കം ലക്ഷക്കണക്കിനാളുകളെ പെരുവഴിയിലാക്കി എയർ ഇന്ത്യ എക്സ്പ്രസ് ജീവനക്കാർ തുടരുന്ന പണിമുടക്ക് രണ്ട് വർഷം മുമ്പ് പൂർത്തിയാക്കിയ സ്വകാര്യവത്കരണത്തിൻ്റെ പരിണതിയാണെന്നും ഇപ്പോഴത്തെ പ്രതിസന്ധി കാഴ്ചക്കാരായി നോക്കിനിൽക്കാതെ, എത്രയും പെട്ടെന്ന് ഇടപെട്ട് പരിഹാരം കാണേണ്ട ബാധ്യത കേന്ദ്രസർക്കാറിൻ്റെതാണെന്നും ഐ.എൻ.എൽ സംസ്ഥാന കമ്മിറ്റി.
ആയിരക്കണക്കിന് പ്രവാസി തൊഴിലാളികളാണ് നാട്ടിൽ കുടുങ്ങിക്കിടക്കുന്നത്. വിസയുടെ കാലാവധി കഴിയുന്നവരും തൊഴിൽ അഭിമുഖത്തിന് കൃത്യസമയത്ത് എത്തിച്ചേരാൻ കഴിയാത്തവരുമായ നിരവധി പേർ കടുത്ത ജീവിത പ്രതിസന്ധിയിലാണ്. വിഷയത്തിൻ്റെ ഗൗരവം സംസ്ഥാന സർക്കാർ കേന്ദ്ര വ്യോമയാന മന്ത്രാലയത്തെ യഥാവിധി ബോധ്യപ്പെടുത്തേണ്ടതുണ്ട്. രാജ്യത്തിൻ്റെ സ്വന്തം വിമാനകമ്പനിയായ എയർ ഇന്ത്യയെ ചുളുവിലക്ക് മോദി സർക്കാർ ടാറ്റാ സൺസിന് കൈമാറിയപ്പോൾ തന്നെ ഇത്തരം ദുരന്തങ്ങളെ കുറിച്ച് പലരും ആശങ്ക പ്രകടിപ്പിച്ചതാണ്. അന്ന് നൽകിയ വാഗ്ദാനങ്ങളൊന്നും പാലിക്കപ്പെട്ടില്ല. എന്നല്ല, ലാഭക്കൊതി മൂത്ത ടാറ്റ മുതലാളിമാർ യാത്രക്കാരെ ചൂഷണം ചെയ്യുന്ന ക്രൂരത അനവൃതം തുടരുകയുമാണ്.
എയർ ഇന്ത്യയുടെ 45,000കോടി രൂപയുടെ ആസ്തി കേവലം 2, 700കോടി രൂപക്ക് ടാറ്റക്ക് കൈമാറിയ ബി.ജെ.പി സർക്കാർ യഥാർഥത്തിൽ രാജ്യത്തെയും ജനങ്ങളെയും വഞ്ചിക്കുകയായിരുന്നു. യാത്രക്കാർ അനുഭവിച്ചുതീർക്കുന്ന ദുരിതങ്ങൾ സഹിക്കവയ്യാതെ ജനം വിമാനത്താവളങ്ങളിലേക്ക് സമരവുമായി എത്തുന്ന അവസ്ഥയാണ് ഉണ്ടാവാൻ പോകുന്നത്. അത് ഒഴിവാക്കാൻ അധികൃതർ എത്രയും പെട്ടെന്ന് ഇടപെട്ട് പ്രശ്നത്തിന് പ്രതിവിധി കാണണമെന്ന് ഐ.എൻ.എൽ സംസ്ഥാന ജന.സെക്രട്ടറി കാസിം ഇരിക്കുർ ആവശ്യപ്പെട്ടു.
