ആറ്റിങ്ങൽ ; സമൂഹത്തിനെ കാർന്നു തിന്നുന്ന ലഹരിക്ക് എതിരെ പോരാടാൻ യുവജനങ്ങൾ ഒന്നിച്ചിറങ്ങണമെന്ന് ജില്ലാ ലീഗൽ സർവ്വീസ് അതോറിറ്റി സെക്രട്ടറിയും , സ്പെഷ്യൽ ജഡ്ജുമായ എസ് ഷംനാദ് പറഞ്ഞു. ആറ്റിങ്ങൽ സിഎസ്ഐ ജംഗ്ലീഷ് മീഡിയം സ്കൂളിൽ വെച്ച് നടന്ന അന്താരാഷ്ട്ര ലഹരി വിരുദ്ധ ദിനാചരണത്തിന്റെ ജില്ലാ തല ഉദ്ഘാടനവും, ജില്ലയിലെ സ്കൂളുകളിൽ ആരംഭിക്കുന്ന സ്റ്റുഡൻസ് പാരാ ലീഗൽ വോളന്റീയർ പദ്ധതിയുടെ ഉദ്ഘാടനവും നിർവ്വഹിച്ച് സംസാരിക്കുകയായിരുന്നു അദ്ദേഹം.
ലോകമാകമാനം ലഹരിക്ക് എതിരെ പോരാടുന്ന വേളയിൽ ഇനിയും നമ്മുടെ തലമുറ മടിച്ചിരിക്കാൻ പാടില്ല. സ്നേഹത്തെ ലഹരിയായി കണ്ടു സഹജീവികളോടും, സുഹുർത്തുക്കളോടും സൗമ്യമായി പെരുമാറുന്നവനാണ് നല്ല മനുഷ്യരാകുന്നത്. അതിന് വേണ്ടി എല്ലാവരും പ്രവർത്തിക്കണമെന്നും അദ്ദേഹം കൂട്ടിച്ചേർത്തു.
ചടങ്ങിൽ സ്കൂളിൽ ആരംഭിച്ച പാരാ ലീഗൽ വോളന്റീയർ പദ്ധതിയിലെ അംഗങ്ങൾക്കുള്ള ബാഡ്ജുകൾ ധരിപ്പിച്ചും അദ്ദേഹം തുടക്കം കുറിച്ചു.
സ്കൂൾ പ്രിൻസിപ്പാൾ സിനി തോമസ് അധ്യക്ഷത വഹിച്ച ചടങ്ങിൽ ആൽക്കഹോൾ ആന്റ് ഡ്രഗ്സ് ഇൻഫർമേഷൻ സെന്റർ എസ്കിക്യൂട്ടീവ് ഡയറക്ടർ ജോൻസൺ ജെ ഇടയാറൻമുള മുഖ്യപ്രഭാഷണം നടത്തി, ആറ്റിങ്ങൽ സ്റ്റേഷൻ ഹൗസ് ഓഫീസർ വി. ജയകുമാർ , എക്സൈസ് അസിസ്റ്റന്റ് ഇൻസ്പെക്ടർ കെ ഷിബുകുമാർ , ഉപജില്ലാ വിദ്യാഭ്യാസ ഓഫീസർ സജി പി, വൈസ് പ്രിൻസിപ്പാൾ ശ്രീജ ഡി, ഹയർ സെക്കന്ററി ഡിവിഷൻ ഇൻ ചാർജ് ബിന്ദു എം എൻ, സ്റ്റാഫ് സെക്രട്ടറി എസ് ശ്രീകല തുടങ്ങിയവർ സംസാരിച്ചു. പിടിഎ പ്രതിനിധി എസ് സാജൻ സ്വാഗതവും, എൻ എസ് എസ് പ്രോഗ്രാം ഓഫീസർ ഗീതാകൃഷ്ണ പി കെ നന്ദിയും പറഞ്ഞു.