കോഴിക്കോട്: ഇന്‍സ്റ്റഗ്രാം വഴി അശ്ലീല സന്ദേശങ്ങള്‍ അയച്ചത് ചോദ്യം ചെയ്ത യുവതിക്ക് യുവാവിന്റെ ക്രൂര മര്‍ദനം. യുവാവിന്റെ ആക്രമണത്തില്‍ യുവതിയുടെ കണ്ണിന് ഗുരുതരമായി പരുക്കേറ്റു. ഓമശേരി നടമ്മല്‍ പൊയിലിലാണ് സംഭവം. യുവതിയുടെ നാട്ടുകാരനായ ചെറുവോട്ട് മിര്‍ഷാദ് എന്ന യുവാവാണ് ആക്രമണം നടത്തിയത്. പൊലീസ് കേസെടുത്തതിന് പിന്നാലെ യുവാവ് ഒളിവില്‍ പോയി.
മിര്‍ഷാദ് യുവതിയുടെ ഇന്‍സ്റ്റാഗ്രാം ഐഡിയിലേക്ക് നിരന്തരം അശ്ലീല സന്ദേശം അയക്കുകയായിരുന്നു. ഇതിന് ഇന്‍സ്റ്റാഗ്രാം വഴി യുവതി മറുപടി നല്‍കി. എന്നിട്ടും ആവര്‍ത്തിച്ചപ്പോള്‍ യുവാവിന്റെ വീട്ടില്‍ പോയി യുവതി പരാതിപ്പെട്ടു. അതിന്റെ വൈരാഗ്യത്തില്‍ മിര്‍ഷാദ് വഴിയില്‍ തടഞ്ഞുവെച്ച് ആക്രമിച്ചെന്നാണ് യുവതി പരാതിയില്‍ പറയുന്നത്.
ആക്രമണത്തില്‍ യുവതയുടെ കണ്ണിനും തലക്കുമാണ് പരുക്കുള്ളത്. യുവതിയുടെ പരാതിയില്‍ കൊടുവള്ളി പൊലീസ് കേസ്സെടുത്തു. യുവാവിന്റെ ഫോണ്‍ സ്വിച്ച് ഓഫ് ആണെന്നും മിര്‍ഷാദ് ഒളിവില്‍ പോയെന്നും കൊടുവള്ളി പൊലീസ് പറയുന്നു.
