വയനാട്; പുനരധിവാസം സമയബന്ധിതമായി പൂർത്തിയാക്കാൻ ആസൂത്രണം വേണം
കോഴിക്കോട്: പ്രകൃതി ദുരന്തങ്ങൾ ഉൾപ്പടെ അടിയന്തര ഘട്ടങ്ങളെ നേരിടാൻ പൗരന്മാരെ പ്രാപ്‌തരാക്കുന്നതിന് സ്ഥിരം സംവിധാനം സ്ഥാപിക്കണമെന്ന് വിസ്‌ഡം യൂത്ത് കോഴിക്കോട് സൗത്ത് ജില്ലാ സമിതി സംഘടിപ്പിച്ച വൈജ്ഞാനിക യുവജന സംഗമം സർക്കാറിനോട് ആവശ്യപ്പെട്ടു.
വിപത്ഘട്ടങ്ങളിൽ സ്വയം സുരക്ഷിതരാകാനും അടിയന്തര രക്ഷാ പ്രവർത്തനങ്ങൾക്കും മുഴുവൻ പൗരന്മാരെയും പ്രാപ്‌തരാക്കാൻ വ്യവസ്ഥാപിതമായ സർക്കാർ സംവിധാനം സ്ഥാപിക്കപ്പെടൽ കാലഘട്ടത്തിന്റെ അനിവാര്യതയായി മാറിയിരിക്കുന്നു. വിദ്യാർത്ഥികൾക്കും യുവജനങ്ങൾക്കും പാഠ്യപദ്ധതിയുടെ ഭാഗമായി തന്നെ പരിശീലനം ഒരുക്കണം. ഹൈ റേഞ്ച്, തീരപ്രദേശം, നഗരം തുടങ്ങി ജനങ്ങൾ താമസിക്കുന്ന ഭൂപ്രകൃതിയുടെ സ്വഭാവമനുസരിച്ച് അനിവാര്യമായ കായിക പരിശീലനം അതത് പ്രദേശങ്ങളിലെ ജനങ്ങൾക്ക് നൽകാൻ പരിശീലന കേന്ദ്രങ്ങളും അനിവാര്യമായ അത്യാധുനിക സവിധാനങ്ങളും സർക്കാർ തയ്യാറാകണമെന്നും സംഗമം കൂട്ടി ചേർത്തു.
വയനാട് ദുരന്തത്തിന് ശേഷം പുനരധിവാസ പദ്ധതിക്കായുള്ള സഹായങ്ങളുമായി ധാരാളം ആളുകൾ മുന്നോട്ട് വന്ന സാഹചര്യത്തിൽ, പുനരധിവാസം സമയബന്ധിതമായി പൂർത്തിയാക്കാൻ സർക്കാറിന് ആസൂത്രണം വേണമെന്നും സംഗമം അഭിപ്രായപ്പെട്ടു.
ദുരിതബാധിതരെ ചേർത്ത് നിർത്താൻ വിസ്‌ഡം യൂത്തിന്റെ നേതൃത്വത്തിൽ നടപ്പാക്കുന്ന പദ്ധതികൾക്ക് സംഗമം അന്തിമ രൂപം നൽകി.
വിസ്‌ഡം യൂത്ത് ഓർഗനൈസേഷൻ സംസ്ഥാന പ്രസിഡന്റ് കെ. താജുദ്ദീൻ സ്വലാഹി സംഗമം ഉദ്ഘാടനം നിർവഹിച്ചു. ജില്ലാ പ്രസിഡന്റ് അമീർ അത്തോളി അധ്യക്ഷത വഹിച്ചു. ജാമിഅ അൽ ഹിന്ദ് ഡയറക്‌ടർ ഫൈസൽ മൗലവി, പീസ് റേസിയോ സി.ഇ.ഒ പ്രൊഫ. ഹാരിസ് ബിൻ സലിം, ഹംസ മദീനി, ശിഹാബ് എടക്കര, അജ്മൽ ഫൗസാൻ തുടങ്ങിയവർ വിവിധ വിഷയങ്ങളിൽ പ്രബന്ധങ്ങൾ അവതരിപ്പിച്ചു.
അസ്ഹർ ഫറോക്ക്, ഹനാൻ ബാസിത്, ജുബൈർ, റഷീദ് പാലത്ത്, സി.വി അസീൽ, ശിഹാബുദ്ധീൻ, പി.പി ജംഷീർ, അബ്ദുൽ ഗഫൂർ നരിക്കുനി, സാബിർ, മുഫീദ് നന്മണ്ട, ഷാബിൻ മദനി, മുഫ്തി താഹിർ തുടങ്ങിയവർ വിവിധ സെഷനുകൾക്ക് നേതൃത്വം നൽകി.
ജില്ലാ സെക്രട്ടറി എ.എം ജംഷീർ സ്വാഗതവും ട്രഷറർ ജാബിർ നന്മണ്ട നന്ദിയും പറഞ്ഞു.
