കല്പറ്റ: റമദാനിലൂടെ കൈവരിച്ച ആത്മീയ വിശുദ്ധി, ആദർശ പ്രതിബദ്ധതക്കും മാനവ മൂല്യങ്ങളുടെ വളർച്ചയ്ക്കും കരുത്തായി മാറ്റാൻ പരിശ്രമിക്കണമെന്ന് കെ എന്‍ എം വയനാട് ജില്ലാ സെക്രട്ടറി സയ്യിദലി സ്വലാഹി. കല്പറ്റ എം സി എഫ് സ്കൂള്‍ ഗ്രൌണ്ടില്‍ നടന്ന സംയുക്ത ഈദ്ഗാഹില്‍ കുത്തുബ നിര്‍വഹിക്കുകയായിരുന്നു അദ്ദേഹം.
സർവ്വ തിന്മകളുടെയും അതിക്രമങ്ങളുടെയും കേന്ദ്രമായി നാട് മാറുമ്പോൾ ദൗത്യമുള്ള സമുദായമെന്ന നിലയിൽ കർമ്മപഥത്തിൽ സജ്ജരാകാൻ ഓരോരുത്തരും ശ്രദ്ധിക്കണം.
നഷ്ടപ്പെട്ടുകൊണ്ടിരിക്കുന്ന നാടിന്‍റെ സൗഹാർദം തിരിച്ചുപിടിച്ച് മാനവതയുടെ കരുത്തിനായി ഒറ്റക്കെട്ടായി മുന്നേറണമെന്നും അദ്ദേഹം വിശ്വാസികളെ ഓർമിപ്പിച്ചു.
ഇസ്ലാമിന്‍റെ ആദര്‍ശമാണ് നമ്മുടെ കയ്യിലുള്ളതെന്ന് വിശ്വാസികള്‍ മറക്കരുത്. അതുകൊണ്ട് തന്നെ നിങ്ങള്‍ ആരോടും ശത്രുതയോടെ പെരുമാറാന്‍ പാടില്ല. നിങ്ങള്‍ നന്മകൊണ്ടും തഖ് വ കൊണ്ടും സഹായിക്കണം. ലഹരിക്കെതിരെയുള്ള പോരാട്ടത്തില്‍ എല്ലാവരും സജീവമാകണം. സ്ത്രീകള്‍ക്കും ഇക്കാര്യത്തില്‍ പ്രധാന പങ്കുവഹിക്കാനുണ്ട്. സയ്യിദലി സ്വലാഹി പറഞ്ഞു.
