തിരുവനന്തപുരം: കഴക്കൂട്ടത്ത് പെണ്‍കുട്ടിക്ക് നേരെ ക്രൂര പീഡനം. പെണ്‍കുട്ടിയെ ഗോഡൗണില്‍ എത്തിച്ച ശേഷം ആണ്‍സുഹൃത്ത് പീഡിപ്പിക്കുകയായിരുന്നു. പ്രതി ആറ്റിങ്ങള്‍ അവനവഞ്ചേരി സ്വദേശി കിരണിനെ പൊലീസ് അറസ്റ്റ് ചെയ്തു. കിരണ്‍ യുവതിയെ ബലം പ്രയോഗിച്ച് ഗോഡൗണില്‍ എത്തിക്കുകയായിരുന്നു. ഗോഡൗണില്‍ നിന്നും യുവതി വിവസ്ത്രയായി ഓടിരക്ഷപ്പെടുകയായിരുന്നു. ഗുരുതര പരുക്കുകളോടെ പെണ്‍കുട്ടി എസ് എ ടി ആശുപത്രിയില്‍ ചികിത്സക്കായി പ്രവേശിപ്പിച്ചിരിക്കുകയാണ്.
പെണ്‍കുട്ടിയും യുവാവും സുഹൃത്തുക്കളാണെന്നാണ് പൊലീസ് പറയുന്നത്. യുവതി മറ്റൊരു സുഹൃത്തിനൊപ്പം ടെക്‌നോപാര്‍ക്കിന് സമീപത്തെ ഹോട്ടലില്‍ ആഹാരം കഴിക്കുവാന്‍ പോയതാണ് കിരണ്‍ പ്രകോപിതനാകാന്‍ കാരണം. കിരണ്‍ യുവതിയെ ബൈക്കില്‍ കയറ്റിക്കൊണ്ട് പോയതിന് ശേഷം മര്‍ദിക്കുകയായിരുന്നു. പിന്നീട് കഴക്കൂട്ടത്ത് കൃഷി ഓഫിസിന്റെ സമീപത്തുള്ള ഗോഡൗണിലെത്തിച്ച് മര്‍ദിക്കുകയും പീഡിപ്പിക്കുകയുമായിരുന്നു. ശനിയാഴ്ചയാണ് പെണ്‍കുട്ടിയെ കിരണ്‍ തട്ടിക്കൊണ്ട് പോകുന്നത്. ഞായറാഴ്ച രാവിലെയാണ് പെണ്‍കുട്ടി സമീപത്തെ വീട്ടിലെത്തി സഹായം അഭ്യര്‍ഥിച്ചത്.
