കവലയൂര്‍: ഗവണ്‍മെന്റ് ഹയര്‍ സെക്കന്‍ഡറി സ്‌കൂളിലെ എന്‍ എസ് എസ് വിദ്യാര്‍ത്ഥികള്‍ സ്‌കൂളിന്റെ ഹരിത ഗ്രാമമായ പതിനാറാം വാര്‍ഡില്‍ ഓണക്കിറ്റ് വിതരണം ചെയ്തു. ഓണക്കിറ്റ് വിതരണ ഉദ്ഘാടനം പതിനാറാം വാര്‍ഡ് ജനപ്രതിനിധിയും മണമ്പൂര്‍ ഗ്രാമപഞ്ചായത്ത് വികസന കാര്യ സ്റ്റാന്‍ഡിങ് കമ്മിറ്റി ചെയര്‍മാനുമായ സുധീര്‍ അവര്‍കള്‍ നിര്‍വഹിച്ചു.
കുട്ടികള്‍ ഏറ്റെടുത്ത് നടത്തുന്ന ഇത്തരം പ്രവര്‍ത്തനങ്ങള്‍ അദ്ദേഹം അനുമോദിക്കുകയും ഭാവിയില്‍ ഇത്തരം കാരുണ്യ പ്രവര്‍ത്തനങ്ങള്‍ ശക്തമായ രീതിയില്‍ കുട്ടികള്‍ ഇടപെടണമെന്നും അദ്ദേഹം പ്രസംഗത്തില്‍ ആവശ്യപ്പെട്ടു. മണമ്പൂര്‍ ഗ്രാമപഞ്ചായത്ത് പ്രതിനിധിയും പിടിഎ പ്രസിഡന്റുമായ പി. സുരേഷ് കുമാര്‍ അധ്യക്ഷത വഹിച്ച ചടങ്ങില്‍ പ്രിന്‍സിപ്പല്‍ എം എസ് സുധീര്‍ സ്വാഗതം ആശംസിച്ചു. എന്‍ എസ് എസ് പ്രോഗ്രാം കോഡിനേറ്റര്‍ രാജേഷ് കുമാര്‍ പ്രോജക്ട് വിശദീകരണം നടത്തി. പി ടി എ വൈസ് പ്രസിഡണ്ട് അനില്‍കുമാര്‍, അധ്യാപകര്‍, എന്‍ എസ് എസ് വിദ്യാര്‍ത്ഥികള്‍ തുടങ്ങിയവര്‍ സംബന്ധിച്ച ചടങ്ങില്‍ എന്‍ എസ് എസ് ലീഡര്‍ ഹരിപ്രിയ നന്ദി പ്രകാശിപ്പിച്ചു.
