കോഴിക്കോട്: ജില്ലാ ഭരണകൂടത്തിന്റേയും സാമൂഹ്യ ക്ഷേമ വകുപ്പിന്റേയും നേതൃത്വത്തില്‍ പ്രവര്‍ത്തിക്കുന്ന ഉദയം ഹോമില്‍ ഓണമാഘോഷിച്ചു. തുറമുഖം മ്യൂസിയം പുരാവസ്തു പുരാരേഖ വകുപ്പ് മന്ത്രി അഹമ്മദ് ദേവര്‍കോവില്‍ പരിപാടി ഉദ്ഘാടനം ചെയ്തു.
കേരളീയര്‍ ഒന്നിച്ച് ആഘോഷിക്കുന്ന ഓണം മലയാളികളുടെ തനത് ഉത്സവമാണെന്നും ആരും മാറ്റിനിര്‍ത്തപ്പെടാന്‍ പാടില്ലെന്ന ചിന്താഗതിയാണ് മനസ്സിലുണ്ടാകേണ്ടതെന്നും മന്ത്രി പറഞ്ഞു. ഉദയത്തിലെ അന്തേവാസികള്‍ക്കൊപ്പം ഓണം ആഘോഷിക്കാന്‍ സാധിച്ചത് ഏറെ സന്തോഷകരമാണെന്നും ഏവര്‍ക്കും ഓണാശംസകള്‍ നേരുന്നതായും മന്ത്രി പറഞ്ഞു.
ചടങ്ങില്‍ വാര്‍ഡ് കൗണ്‍സിലര്‍ ഡോ. അജിത പി.എന്‍, ജെസി ടീച്ചര്‍, സമദ് റിഫാസ്, കോഴിക്കാടന്‍ ഫുഡ് പ്രൊഡക്‌സ് എം.ഡി ജാഫര്‍ എന്നിവര്‍ സംസാരിച്ചു. ഉദയം പ്രൊജക്ട് സ്‌പെഷ്യല്‍ ഓഫീസര്‍ ഡോ. ജി രാഗേഷ് സ്വാഗതവും പ്രൊജക്ട് കോര്‍ഡിനേറ്റര്‍ സജീര്‍ പി നന്ദിയും പറഞ്ഞു. അന്തേവാസികള്‍ക്കൊപ്പം ഓണസദ്യയും കഴിച്ച ശേഷമാണ് മന്ത്രി മടങ്ങിയത്.
