കൊച്ചി: മിക്‌സി പൊട്ടിത്തെറിച്ച് ഗായിക അഭിരാമി സുരേഷിന് പരുക്ക്. മിക്‌സി പൊട്ടിത്തെറിച്ച് ബ്ലേഡ് കൈയ്യില്‍ തട്ടിയാണ് പരുക്കേറ്റത്. അഭിരാമിയുടെ വലത് കയ്യിലെ അഞ്ച് വിരലുകളിലും പരുക്കേറ്റിട്ടുണ്ട്. അഭിരാമി തന്നെയാണ് അപകടത്തിന്റെ വിവരം സോഷ്യല്‍ മീഡിയയില്‍ പങ്കുവച്ചത്.
വീഡിയോകള്‍ ചെയ്ത് സന്തോഷത്തോടെ പ്രേക്ഷകരോടു സംവദിക്കാനൊരുങ്ങവെയാണ് അപ്രതീക്ഷിതമായി ഇത്തരമൊരു അപകടം സംഭവിച്ചതെന്നും മിക്‌സി പൊട്ടിത്തെറിക്കാനുണ്ടായ കാരണം വ്യക്തമല്ലെന്നും അഭിരാമി പറയുന്നു. കൈവിരലുകളില്‍ ആഴമേറിയ മുറിവും ചെറിയ രീതിയില്‍ പൊള്ളലുമേറ്റിട്ടുണ്ട്. ആശുപത്രിയില്‍ ചികിത്സ തേടിയ അഭിരാമി ഇപ്പോള്‍ വിശ്രമത്തിലാണ്.
ഈ അപകടമൊന്നും തന്നെ പാചകത്തില്‍ നിന്നും പിന്തിരിപ്പിക്കില്ലെന്നും കുറച്ചു നാളത്തെ വിശ്രമത്തിനു ശേഷം വീണ്ടും മടങ്ങിയെത്തുമെന്നും അഭിരാമി പറയുന്നു. തന്റെ അവശത ഓര്‍ത്ത് ആരും പേടിക്കേണ്ടതില്ലെന്നും വലിയ പ്രശ്‌നങ്ങളില്ലെന്നും അഭിരാമി വ്യക്തമാക്കി.
