കല്പറ്റ: കുടുംബശ്രീയുടെ കീഴില്‍ ഉയര്‍ന്നനിലവാരമുളള പ്രീമിയം റസ്‌റ്റൊറന്റുകള്‍ ആരംഭിക്കുന്നു. കുടുംബശ്രീ പ്രീമിയം കഫേ എന്ന പേരില്‍ റസ്‌റ്റൊറന്റുകള്‍ ആരംഭിക്കുന്നതിന് താല്പര്യമുള്ള കുടുംബശ്രീ അംഗങ്ങള്‍, കുടുംബാംഗങ്ങള്‍, ഓക്‌സിലറി ഗ്രൂപ്പ് അംഗങ്ങള്‍ എന്നിവരില്‍ നിന്നും താല്‍പര്യ പത്രം ക്ഷണിച്ചു.
താല്പര്യപത്രം കുടുംബശ്രീ നിഷ്‌കര്‍ഷിച്ചിട്ടുള്ള ഫോര്‍മാറ്റില്‍ 2023 ഡിസംബര്‍ 7 തിയതി ഉച്ചക്ക് 12 മണിക്ക് മുമ്പ് ജില്ലാ മിഷന്‍ കോഡിനേറ്റര്‍, പോപ്പുലര്‍ ബില്‍ഡിംഗ്, ഓപ്പോസിറ്റ് സിവില്‍ സ്‌റ്റേഷന്‍, കല്പറ്റ നോര്‍ത്ത് എന്ന വിലാസത്തില്‍ ലഭ്യമാക്കേണ്ടതാണ്. കൂടുതല്‍ വിവരങ്ങള്‍ക്ക് 04936206589, 8848478861, കൂടാതെ കുടുംബശ്രീ വെബ്‌സൈറ്റ് www.kudumbashree.org സന്ദര്‍ശിക്കാവുന്നതാണ്.
അപേക്ഷിക്കുന്നതിനുള്ള യോഗ്യത: അപേക്ഷകര്‍ കുടുംബശ്രീ അംഗമോ കുടുംബാംഗമോ ഓക്‌സിലറി ഗ്രൂപ്പ് അംഗമോ ആയിരിക്കേണ്ടതാണ്, വ്യക്തിഗതമായോ ഗ്രൂപ്പായോ അപേക്ഷിക്കാവുന്നതാണ് (ഗ്രൂപ്പ് അംഗങ്ങള്‍ കുടുംബശ്രീ അംഗമോ കുടുംബാംഗമോ ഓക്‌സിലറി അംഗമോ ആയിരിക്കേണ്ടതാണ്), ഭക്ഷണശാലകള്‍ നടത്തിയ പ്രവര്‍ത്തന പരിചയം അഭികാമ്യം, അപേക്ഷക/അപേക്ഷകര്‍ പ്രീമിയം കഫേ ആരംഭിക്കുന്നതിനുള്ള സ്ഥലവും കെട്ടിടസൗകര്യവും കണ്ടെത്തേണ്ടതും (നിലവില്‍ പ്രവര്‍ത്തിച്ചുകൊണ്ടിരിക്കുന്ന ഭക്ഷണശാലകളും ആകാം) ഇത് പ്രവര്‍ത്തനക്ഷമമാക്കുന്നതിനുള്ള മറ്റു സൗകര്യങ്ങള്‍ ഉറപ്പാക്കുകയും ചെയ്യേണ്ടതാണ്.
അംഗീകാരം ലഭിച്ചാല്‍ കുറഞ്ഞത് ഒരുമാസത്തിനുള്ളില്‍ പ്രവര്‍ത്തന സജ്ജമാക്കാന്‍ സാധിക്കുന്നവരായിരിക്കണം. പ്രീമിയം കഫേ ആരംഭിക്കുന്നതിനും പ്രവര്‍ത്തിപ്പിക്കുന്നതിനുമുള്ള മൂലധനം (ബാങ്ക് വായ്പ/ ഓണ്‍ ഫണ്ട്) സ്വയം കണ്ടെത്തേണ്ടതാണ്. ബാങ്ക് വായ്പക്ക് പലിശ സബ്‌സിഡി കുടുംബശ്രീ മുഖേന നല്‍കുന്നതാണ്.
