പാലാ: കുട്ടികളുടെ കഴിവുകളെ വളരുന്ന പ്രായത്തില്‍ പ്രോത്സാഹിപ്പിച്ചാല്‍ ഒട്ടേറെ പ്രതിഭാശാലികളെയും സാമൂഹ്യ പ്രതിബദ്ധതയുള്ള തലമുറയെയും വാര്‍ത്തെടുക്കാന്‍ സാധിക്കുമെന്ന് ഗോവ ഗവര്‍ണര്‍ പി എസ് ശ്രീധരന്‍പിള്ള പറഞ്ഞു. പാലാ ചാവറ പബ്‌ളിക് സ്‌കൂളിലെ എട്ടാം ക്ലാസ് വിദ്യാര്‍ത്ഥി ജോസഫ് കുര്യന്‍ പരസഹായമില്ലാതെ തയ്യാറാക്കിയ യുട്യൂബ് ചാനലില്‍ ഒരു ലക്ഷത്തിലേറെ വരിക്കാരെ നേടിയതിന് യൂട്യൂബ് ഏര്‍പ്പെടുത്തിയ യുട്യൂബ് ക്രിയേറ്റര്‍ അവാര്‍ഡായ സില്‍വര്‍ ബട്ടണ്‍ സമ്മാനിച്ചു സംസാരിക്കുകയായിരുന്നു അദ്ദേഹം. കുട്ടികളുടെ അഭിരുചികള്‍ മനസിലാക്കി അവരുടെ കഴിവുകള്‍ കണ്ടെത്താന്‍ നമുക്ക് കഴിയണം. അങ്ങനായാല്‍ നമ്മുടെ ഇടയില്‍ നിന്നു തന്നെ മികച്ച ശാസ്ത്രജ്ഞരെയും മികച്ച അഭിനേതാക്കളെയും മികച്ച കായികതാരങ്ങളെയും ഒക്കെ വളര്‍ത്തിയെടുക്കാനാവുമെന്നും പി എസ് ശ്രീധരന്‍പിള്ള ചൂണ്ടിക്കാട്ടി. അഡ്വ ജെ ആര്‍ പത്മകുമാര്‍, മഹാത്മാഗാന്ധി നാഷണല്‍ ഫൗണ്ടേഷന്‍ ചെയര്‍മാന്‍ എബി ജെ ജോസ്, ജിനോ ജോര്‍ജ് ഞള്ളമ്പുഴ എന്നിവരും പങ്കെടുത്തു.
മാസ്റ്റര്‍ എഡിറ്റിംഗ് എന്ന പേരിലുള്ള യുട്യൂബ് ചാനലില്‍ വീഡിയോ എഡിറ്റിംഗ് ആപ്പുകള്‍ ഉപയോഗിച്ചു മൊബൈല്‍ ഫോണില്‍ സ്വയം എഡിറ്റു ചെയ്താണ് ജോസഫ് കുര്യന്‍ വീഡിയോകള്‍ ഉള്‍പ്പെടുത്തുന്നത്. കോപ്പി റൈറ്റ് ഇല്ലാത്ത സംഗീതം കണ്ടെത്തി വീഡിയോയില്‍ ചേര്‍ക്കും. കടുത്ത റൊണാള്‍ഡോ ആരാധകനായ ജോസഫ് കുര്യന്‍ തയ്യാറാക്കിയ വീഡിയോകളില്‍ കൂടുതലും തന്റെ ആരാധനാപാത്രമായ റൊണാള്‍ഡോയുടെ വീഡിയോകളാണ്. മെസ്സി, നെയ്മര്‍, എംപാബേ തുടങ്ങിയ നിരവധി കളിക്കാരുടെയും വീഡിയോകളും ചാനലില്‍ ഉണ്ട്. ജോസഫ് തയ്യാറാക്കിയ 360 ല്‍ പരം വീഡിയോകള്‍ ഇതിനോടകം നാലരകോടിയിലേറെ ആളുകളാണ് കണ്ടത്. ജോസഫ് കുര്യന്‍ ഫുട്‌ബോളിലും പരിശീലനം നേടുന്നുണ്ട്. കൊച്ചിടപ്പാടി മൂലയില്‍തോട്ടത്തില്‍ എബി ജെ ജോസിന്റെ പുത്രനാണ് ജോസഫ് കുര്യന്‍.
