കൊല്ലം: പാരിപ്പള്ളി യുകെഎഫ് എന്‍ജിനീയറിങ് കോളേജില്‍ ഇഗ്‌നിത്ര 2023 ന്റെ ഭാഗമായി സ്‌കൂള്‍ വിദ്യാര്‍ത്ഥികള്‍ക്ക് സംഘടിപ്പിച്ച ഇഗ്‌നിത്ര ഇന്റര്‍ സ്‌കൂള്‍ ഫുട്‌ബോള്‍ മത്സരത്തില്‍ പരവൂര്‍ തെക്കുംഭാഗം ഗവണ്‍മെന്റ് ഹയര്‍ സെക്കന്‍ഡറി സ്‌കൂള്‍ ജേതാക്കളായി. വിവിധ ജില്ലകളില്‍ നിന്നുള്ള എട്ടു മുതല്‍ പന്ത്രണ്ട് വരെയുള്ള ക്ലാസുകളിലെ വിദ്യാര്‍ത്ഥികള്‍ക്കായി ഇഗ്‌നിത്ര ഫെസ്റ്റിന്റെ ഭാഗമായി സംഘടിപ്പിച്ച യു കെ എഫ് സോക്കര്‍ കപ്പ് ഫുട്‌ബോള്‍ മത്സരത്തിലാണ് എസ് എം എച്ച് എസ് എസ് കൊട്ടറ സ്‌കൂള്‍ ടീമിനെ പരാജയപ്പെടുത്തി പരവൂര്‍ തെക്കുംഭാഗം ഗവണ്‍മെന്റ് ഹയര്‍ സെക്കന്‍ഡറി സ്‌കൂള്‍ ചാമ്പ്യന്മാരായത്. ഫുട്‌ബോള്‍ മത്സരം യു കെ എഫ് എക്‌സിക്യൂട്ടീവ് ഡയറക്ടര്‍ പ്രൊഫ ജിബി വര്‍ഗീസ് ഉദ്ഘാടനം ചെയ്തു.
വിവിധ സ്‌കൂളുകളില്‍ നിന്നുള്ള 20 ടീം അംഗങ്ങളാണ് മത്സരത്തില്‍ പങ്കെടുത്തത്. കൊട്ടറ എസ് എം എച്ച് എസ് രണ്ടും മങ്ങാട് ഗവണ്‍മെന്റ് ഹയര്‍ സെക്കന്‍ഡറി സ്‌കൂള്‍ മൂന്നും സ്ഥാനങ്ങള്‍ നേടി. കൂടാതെ ഇഗ്‌നിത്ര 2023 ഭാഗമായി വിവിധ മത്സരങ്ങളും നടന്നു. വിജയികളായ ടീം അംഗങ്ങള്‍ക്ക് അവാര്‍ഡുകള്‍ നല്‍കി.
കോളേജ് പ്രിന്‍സിപ്പാള്‍ ഡോ. ഇ. ഗോപാലകൃഷ്ണ ശര്‍മ, വൈസ് പ്രിന്‍സിപ്പാള്‍ ഡോ. വി. എന്‍. അനീഷ്, ഡീന്‍ അക്കാഡമിക് ഡോ. ജയരാജു മാധവന്‍, ഡീന്‍ സ്റ്റുഡന്റ് അഫയേഴ്‌സ് ഡോ. രശ്മി കൃഷ്ണപ്രസാദ്, ഫിസിക്കല്‍ എഡ്യൂക്കേഷന്‍ വിഭാഗം ഡയറക്ടര്‍ പ്രൊഫ. ഉണ്ണി സി. നായര്‍ എന്നിവര്‍ സംസാരിച്ചു.
