പയ്യോളി: പൂക്കോട് സംഭവത്തിന് ശേഷവും ക്യാംപസുകളില്‍ എസ് എഫ് ഐയുടെ ആക്രമണം തുടരുന്നു. കൊയിലാണ്ടി കൊല്ലം ആര്‍. ശങ്കര്‍ മെമ്മോറിയല്‍ എസ്.എന്‍.ഡി.പി. യോഗം ആര്‍ട്‌സ് ആന്‍ഡ് സയന്‍സ് കോളേജിലെ ബി.എസ്‌സി. കെമിസ്ട്രി രണ്ടാംവര്‍ഷ വിദ്യാര്‍ഥി സി.ആര്‍. അമലിനാണ് ഒരുസംഘം എസ്.എഫ്.ഐ. പ്രവര്‍ത്തകരുടെ വിചാരണയ്ക്കും മര്‍ദനത്തിനും ഇരയാകേണ്ടി വന്നത്.
പരുക്കേറ്റ വിദ്യാര്‍ഥി ആശുപത്രിയിലെത്തിയപ്പോള്‍ കൃത്യം നടത്തിയവര്‍ ഇടപെട്ട് അത് അപകട സംഭവമാക്കി മാറ്റുകയായിരുന്നു. അമലിന്റെ തലയ്ക്കും മൂക്കിനും മുഖത്തും കൈമുഷ്ടി ചുരുട്ടി തുടരെ തുടരെ ആഞ്ഞ് കുത്തുകയായിരുന്നു. മൂക്കില്‍ നിന്ന് ചോരയൊലിച്ചപ്പോള്‍ മുഖം താഴ്ത്തി നിന്ന വിദ്യാര്‍ത്ഥിയെ അതിനും സമ്മതിച്ചില്ലെന്നും പറയുന്നു.
ഒടുവില്‍ തലകറങ്ങി നിലത്തിരുന്നപ്പോഴാണ് വിചാരണ നിര്‍ത്തി വിട്ടയച്ചത്. സംഭവത്തില്‍ അമലും പിതാവ് പയ്യോളി വില്ലേജ് ഓഫീസര്‍ എ.വി. ചന്ദ്രനും കൊയിലാണ്ടി പൊലീസിലും പ്രിന്‍സിപ്പലിനും ശനിയാഴ്ച പരാതി നല്‍കിയിരിക്കുകയാണ്.
