കോഴിക്കോട്: ലോക പുസ്തകദിനാഘോഷത്തിന്റെ ഭാഗമായി കാളാണ്ടിത്താഴം ദര്‍ശനം ഗ്രന്ഥാലയം കഴിഞ്ഞ ഒരു വര്‍ഷക്കാലം ഏറ്റവും കൂടുതല്‍ പുസ്തകങ്ങള്‍ ഗ്രന്ഥശാലയില്‍ നിന്നെടുത്ത് വായിച്ചവര്‍ക്ക് സമ്മാനങ്ങള്‍ നല്കി. വിവര്‍ത്തന എഴുത്തുകാരന്‍ എ പി കുഞ്ഞാമു സ്വന്തം രചനകള്‍ ദര്‍ശനം ഗ്രന്ഥശാല നിര്‍വ്വാഹകസമിതി അംഗം കൊല്ലറയ്ക്കല്‍ സതീശന് കൈമാറി ഉദ്ഘാടനം ചെയ്തു.
വായന വിജയികളായ എം കെ ഗിരീഷ് (വിരുപ്പില്‍ ), എന്‍ പി അല്ലി, പി കെ പ്രഭാവതി (കാളാണ്ടിത്താഴം), സരോജിനി (പുളിയക്കോട് കുന്ന് ) എന്നിവര്‍ പത്തനംതിട്ട പുസ്തകശാല പ്രസിദ്ധികരിച്ച റസ്സലിന്റെ മലയാളത്തിലെ ആദ്യ ആത്മനോവല്‍ ‘അക്കാമന്‍’ സമ്മാനമായി ഏറ്റുവാങ്ങി. എഴുത്തുകാരി സല്‍മി സത്യാര്‍ത്ഥി 10000 രൂപയുടെ പുസ്തക അലമാര ദര്‍ശനത്തിന് സംഭാവന ചെയ്ത് രക്ഷാധികാരി അംഗത്വം സ്വീകരിച്ചു. എം എന്‍ സത്യാര്‍ത്ഥി ട്രസ്റ്റ് സെക്രട്ടറി ഒ കുഞ്ഞിക്കണാരന്‍ ഗ്രന്ഥശാലക്ക് പുസ്തകങ്ങള്‍ സംഭാവന ചെയ്തു.
ദര്‍ശനം ജോയിന്റ് സെക്രട്ടറി ടി കെ സുനില്‍കുമാര്‍ അധ്യക്ഷത വഹിച്ചു. സെക്രട്ടറി എം എ ജോണ്‍സണ്‍ സ്വാഗതവും വൈസ് പ്രസിഡന്റ് സി പി ആയിഷബി നന്ദിയും പറഞ്ഞു. തുടര്‍ന്നുള്ള ദിവസങ്ങളില്‍ ദര്‍ശനം ഗ്രന്ഥശാലക്ക് സമീപമുള്ള ഹൈസ്‌കൂള്‍ ലൈബ്രറികളായ മെഡിക്കല്‍ കോളേജ് കാമ്പസ് , ജെ ഡി റ്റി ഇസ്ലാം , ദേവഗിരി സേവിയോ എന്നിവയ്ക്ക് പുസ്തകങ്ങള്‍ സംഭാവന ചെയ്യും.
