തിരുവനന്തപുരം: ഗാര്‍ഹിക തൊഴിലാളി അവകാശ സംരക്ഷണ ബില്‍ ഉടന്‍ പ്രാബല്യത്തിലാകുമെന്ന് മുഖ്യമന്ത്രി പിണറായി വിജയന്‍. ‘ഗാര്‍ഹിക തൊഴിലാളികളുടെ അവകാശങ്ങള്‍ സംരക്ഷിക്കാന്‍ ലക്ഷ്യമിട്ട് സംസ്ഥാന സര്‍ക്കാര്‍ നടപ്പാക്കാന്‍ പോകുന്ന പ്രത്യേക ബില്‍ അന്തിമഘട്ടത്തിലാണ്. രാജ്യത്ത് ആദ്യമായിരിക്കും ഇത്തരമൊരു ബില്‍ ഒരു സംസ്ഥാനത്ത് നിലവില്‍ വരുന്നത്. കൂടുതലും സ്ത്രീ പങ്കാളിത്തമുള്ള സംസ്ഥാനത്തെ ഗാര്‍ഹിക തൊഴില്‍ മേഖലയിലെ തൊഴിലാളികള്‍ക്കായുള്ള മറ്റ് പദ്ധതികള്‍ക്കും ആനുകൂല്യങ്ങളും പുറമെയാണിത്,’ മുഖ്യമന്ത്രി പറഞ്ഞു.
കേരളവും അന്താരാഷ്ട്ര തൊഴില്‍ സംഘടനയുമായുള്ള പ്രവര്‍ത്തനങ്ങളുടെ ശതാബ്ദി നിറവില്‍ തൊഴില്‍വകുപ്പും സംസ്ഥാന ആസൂത്രണ ബോര്‍ഡും സംയുക്തമായി സംഘടിപ്പിക്കുന്ന ത്രിദിന അന്താരാഷ്ട്ര ലേബര്‍ കോണ്‍ക്ലേവ് തിരുവനന്തപുരത്ത് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ജാതിമതവര്‍ഗ ലിംഗഭേദങ്ങള്‍ക്കും സാമൂഹിക പശ്ചാത്തലങ്ങള്‍ക്കും അതീതമായി എല്ലാ വിഭാഗം തൊഴിലാളികളോടും കരുതലിലൂന്നിയ വികസന സമീപനമാണ് കേരളത്തിന്റേത്. 2025 ഓടെ അതിദാരിദ്ര്യം കേരളത്തിലില്ലാതാക്കുമെന്നും അടുത്ത 2025 വര്‍ഷങ്ങള്‍ക്കുള്ളില്‍ എല്ലാ വിഭാഗം ജനങ്ങളെയും ചേര്‍ത്തുപിടിച്ച് വികസിത ഇടത്തരം വരുമാനമുള്ള രാജ്യങ്ങളുടേതിന് സമാനമായ വളര്‍ച്ച കേരളം കൈവരിക്കുമെന്നും അദ്ദേഹം പറഞ്ഞു.
വിവിധ വകുപ്പുകള്‍ നടത്തിവരുന്ന നൈപുണ്യവികസന പദ്ധതികളെല്ലാം ഒരു കുടക്കീഴിലാക്കും. പലപ്പോഴും ഒരേ രൂപത്തിലുള്ള പദ്ധതികള്‍ പല വകുപ്പുകള്‍ ഏറ്റെടുത്തു നടത്തുന്നത് ഇരട്ടിപ്പിന് കാരണമാകുന്നു. അതിനാല്‍ നൈപുണ്യവികസനവുമായി ബന്ധപ്പെട്ട എല്ലാ പരിപാടികളുടെയും ഏകോപനവും, അവലോകനവുമടക്കം എല്ലാ പ്രവര്‍ത്തനങ്ങളും സംസ്ഥാനതലത്തിലുള്ള ഒരു മിഷന്റെ കീഴിലാക്കുമെന്നും മുഖ്യമന്ത്രി പറഞ്ഞു.
കേരളത്തെ നവ വൈജ്ഞാനിക സമ്പദ് വ്യവസ്ഥയും സാങ്കേതിക സൗഹൃദ സമൂഹവും ആക്കുക എന്നത് ലക്ഷ്യമാക്കിയുള്ള പ്രവര്‍ത്തനങ്ങളിലാണ് സംസ്ഥാനം. ഇതിന്റെ ഭാഗമായി ഒട്ടേറെ പദ്ധതികള്‍ ആവിഷ്‌കരിച്ച് നടപ്പിലാക്കി വരികയാണ്. പഠനത്തോടൊപ്പം തൊഴില്‍ ചെയ്യുന്നതിന് വിദ്യാര്‍ഥികള്‍ക്ക് അവസരമൊരുക്കുന്ന തൊഴിവല്‍വകുപ്പിന്റെ കര്‍മ്മചാരി പദ്ധതി ഇത്തരത്തില്‍ നടപ്പിലാക്കുന്ന പദ്ധതികളില്‍ ഏറ്റവും പുതിയതാണെന്നും അദ്ദേഹം പറഞ്ഞു.
ലോകവ്യാപകമായി എല്ലാ തൊഴില്‍മേഖലകളും നിരവധി വെല്ലുവിളികള്‍ നേരിടുകയാണെന്നും തൊഴിലാളി ക്ഷേമത്തിനു പ്രധാന്യം നല്‍കുന്ന നിയമനിര്‍മാണങ്ങളിലുടെയും നയങ്ങളിലൂടെയും തൊഴിലാളികളുടെ സാമൂഹിക, സാമ്പത്തിക ഉന്നമനത്തിന് പ്രഥമസ്ഥാനം നല്‍കുന്ന കേരളം ഇത്തരം പ്രശ്‌നങ്ങളെ നേരത്തേ തന്നെ മനസിലാക്കുന്നതിനും അതിനുള്ള പരിഹാരസാധ്യത തേടുന്നതിനും പ്രതിജ്ഞാബദ്ധമാണെന്നും തൊഴില്‍ മന്ത്രി വി ശിവന്‍കുട്ടി പറഞ്ഞു.
പുതിയ കാലം തൊഴില്‍ രംഗത്തുണ്ടാക്കുന്ന എല്ലാ വെല്ലുവിളികളെയും നേരിടാനും അതിജീവിക്കാനും അഭ്യസ്തവിദ്യരായ തൊഴിലന്വേഷകര്‍ക്ക് അവസരം നല്‍കുന്ന തരത്തില്‍ ഫലപ്രദമായ ഇടപെടലും ആശയങ്ങളും നിര്‍ദ്ദേശങ്ങളുമാണ് കോണ്‍ക്ലേവില്‍ നിന്നും സര്‍ക്കാര്‍ പ്രതീക്ഷിക്കുന്നതെന്നും അവ സര്‍ക്കാര്‍ പ്രാധാന്യത്തോടെ പരിഗണിക്കുമെന്നും അദ്ദേഹം പറഞ്ഞു. പരിപാടിയില്‍ അധ്യക്ഷത വഹിച്ചു സംസാരിക്കുകയായിരുന്നു തൊഴില്‍ മന്ത്രി. കോണ്‍ക്ലേവിനോട് അനുബന്ധിച്ച് തയാറാക്കിയ ‘തൊഴില്‍ക്ഷേമ രംഗം’ പ്രത്യേക പതിപ്പിന്റെ പ്രകാശനം മുഖ്യമന്ത്രി നിര്‍വഹിച്ചു. ആദ്യപ്രതി തൊഴില്‍മന്ത്രി ഏറ്റുവാങ്ങി.
മൂന്ന് ദിവസം നടക്കുന്ന കോണ്‍ക്ലേവില്‍ രാജ്യത്തിനകത്തും പുറത്തുനിന്നുമുള്ള തൊഴിലാളി, തൊഴിലുടമാ സംഘടനാ പ്രതിനിധികള്‍, ഭരണ വിജ്ഞാന രംഗത്തെ പ്രമുഖര്‍, നിയമജ്ഞര്‍, അന്താരാഷ്ട്ര തൊഴില്‍ സംഘടനാ പ്രതിനിധികള്‍, വിവിധ സംസ്ഥാനങ്ങളിലെയും സംസ്ഥാനത്തിനകത്തെയും ഉന്നത ഉദ്യോഗസ്ഥര്‍, വിദഗ്ധര്‍, ദേശീയ അന്തര്‍ദേശീയ സര്‍വകലാശാലകളിലെ വിദഗ്ധര്‍ തുടങ്ങി തൊഴില്‍ മേഖലയുമായി ബന്ധപ്പെട്ട 150 ഓളം പേര്‍ പ്രതിനിധികളായി പങ്കെടുക്കുന്നുണ്ട്. കോണ്‍ക്ലേവിന്റെ രണ്ടാം ദിവസമായ വ്യാഴാഴ്ച തൊഴിലാളികളുടെ അവകാശങ്ങളും നിയമനിര്‍മാണവും സാമൂഹ്യ സുരക്ഷയും, അനൗപചാരിക തൊഴില്‍ രീതികളില്‍ നിന്ന് ഔപചാരിക തൊഴില്‍ രീതികളിലേക്കുള്ള മാറ്റവും അതിന്റെ പ്രശ്‌നങ്ങളും വിശകലനവും, ആഭ്യന്തര കുടിയേറ്റവും കുടിയേറ്റ തൊഴിലാളികളുടെ അവകാശ സംരക്ഷണവും, ഗാര്‍ഹിക തൊഴിലാളികള്‍, സ്‌കീം വര്‍ക്കേഴ്‌സ്, കെയര്‍ വര്‍ക്കേഴ്‌സ് എന്നീ തൊഴില്‍ മേഖലകളിലെ തൊഴിലാളികളുടെ ക്ഷേമം, ആധുനിക ജോലി സാധ്യതകളും അതിനനുസൃതമായ നൈപുണ്യവികസനവും, ഗിഗ് പ്ലാറ്റ് ഫോം തൊഴിലാളികളുടെ ക്ഷേമം , ലേബര്‍ സ്ഥിതിവിവരങ്ങള്‍ എന്നീ വിഷയങ്ങളാണ് എഴു സെഷനുകളിലായി ചര്‍ച്ച ചെയ്യുക. കോണ്‍ക്ലേവ് മെയ് 26ന് സമാപിക്കും.
ഹയാത്ത് റീജന്‍സിയില്‍ നടന്ന ഉദ്ഘാടന ചടങ്ങില്‍ കൊറിയന്‍ വിദ്യാഭ്യാസ മന്ത്രി ഡോ. ലീ ജു ഹോ ഓണ്‍ലൈനായി പങ്കെടുത്തു. തെലങ്കാന തൊഴില്‍ മന്ത്രി ചാമകുറ മല്ലറെഡ്ഡി, ബീഹാര്‍ തൊഴില്‍ മന്ത്രി സുരേന്ദ്ര റാം, എളമരം കരീം എം.പി, അന്താരാഷ്ട്ര തൊഴില്‍ സംഘടനയുടെ ഇന്ത്യാ ഹെഡ് സതോഷി സസാക്കി,
ആസൂത്രണ ബോര്‍ഡ് വൈസ് ചെയര്‍മാന്‍ പ്രൊഫ വി.കെ രാമചന്ദ്രന്‍, പ്ലാനിംഗ് ആന്റ് ഇക്കണോമിക്‌സ് അഫയേഴ്‌സ് അഡീഷനല്‍ ചീഫ് സെക്രട്ടറി പുനീത് കുമാര്‍, തൊഴിലും നൈപുണ്യവും വകുപ്പ് സെക്രട്ടറി അജിത്കുമാര്‍, ലേബര്‍ കമ്മീഷണര്‍ കെ വാസുകി, എംപ്ലോയ്‌മെന്റ് ഡയറക്ടര്‍ വീണ മാധവന്‍ എന്നിവരും സംബന്ധിച്ചു.
