കോഴിക്കോട്: സാമൂഹ്യ പിന്നോക്കാവസ്ഥയിലുള്ള പഞ്ചായത്തുകളുടെ സമഗ്രമായ വികസനം ലക്ഷ്യമാക്കി സമഗ്ര ശിക്ഷാ കേരളം നടപ്പിലാക്കുന്ന സവിശേഷ പദ്ധതിയായ സേവാസ് (Self Emerging Village through Advanced Support) പദ്ധതിയുടെ സംസ്ഥാനതല ഉദ്ഘാടനം ജൂണ്‍ 12 ന് രാവിലെ 12 മണിക്ക് ചക്കിട്ടപാറയില്‍ നടക്കും. പൊതുവിദ്യാഭ്യാസ വകുപ്പു മന്ത്രി വി. ശിവന്‍കുട്ടി ഉദ്ഘാടനം നിര്‍വ്വഹിക്കും.
പാര്‍ശ്വവല്‍കൃത മേഖലയിലെ പഞ്ചായത്തുകളെ ഏറ്റെടുത്ത് സാമൂഹിക സാംസ്‌കാരിക സാമ്പത്തിക വികാസം സാധ്യമാക്കലാണ് പദ്ധതിയുടെ ലക്ഷ്യം. ഇതിനായി അഞ്ച് വര്‍ഷത്തെ നിരന്തരവും സമഗ്രവുമായ പ്രവര്‍ത്തനത്തിലൂടെ വിദ്യാഭ്യാസ മേഖലയെ ശാക്തീകരിക്കും. ആദിവാസിപട്ടിക വര്‍ഗ വിദ്യാര്‍ത്ഥികള്‍ ഉള്‍പ്പെടുന്ന പേരാമ്പ്ര ബി.ആര്‍.സി പരിധിയിലുള്ള മലയോര പ്രദേശമായ ചക്കിട്ടപാറ പഞ്ചായത്തിനെയാണ് ജില്ലയില്‍ പദ്ധതിക്കായി ആദ്യ ഘട്ടത്തില്‍ തെരഞ്ഞെടുത്തിട്ടുള്ളത്. സ്‌കൂളുകളും താമസ സ്ഥലവും അടിസ്ഥാനമാക്കിയുള്ള അവസ്ഥാപഠനത്തിന്റെ അടിസ്ഥാനത്തിലാണ് പദ്ധതിയുടെ മാസ്റ്റര്‍ പ്ലാന്‍ തയാറാക്കുകയെന്ന് സമഗ്ര ശിക്ഷാ ജില്ലാ കോര്‍ഡിനേറ്റര്‍ ഡോ.എ.കെ.അബ്ദുല്‍ ഹക്കീം അറിയിച്ചു.
ചടങ്ങില്‍ ടി. പി രാമകൃഷ്ണന്‍ എം എല്‍ എ അധ്യക്ഷത വഹിക്കും. സമഗ്ര ശിക്ഷാ കേരളം എ എസ് പി ഡി ആര്‍ എസ് ഷിബു പദ്ധതി വിശദീകരണം നടത്തും. ജില്ലാ പഞ്ചായത്ത് പ്രസിഡന്റ് ഷീജ ശശി കുട്ടികള്‍ക്കുള്ള സൈക്കിള്‍ വിതരണം ചെയ്യും. പേരാമ്പ്ര ബ്ലോക്ക് പഞ്ചായത്ത് പ്രസിഡന്റ് എന്‍ പി ബാബു ഫസ്റ്റ് എയ്ഡ് ബോക്‌സ് വിതരണം ചെയ്യും. എസ് എസ് കെ ജില്ലാ പ്രാെജക്ട് കോഡിനേറ്റര്‍ ഡോ.എ.കെ അബ്ദുല്‍ ഹക്കീം സേവാസ് പദ്ധതിയുടെ മാസ്റ്റര്‍ പ്ലാന്‍ അവതരിപ്പിക്കും. ചടങ്ങില്‍ ജനപ്രതിനിധികളും വിദ്യാഭ്യാസ സാംസ്‌കാരിക പ്രവര്‍ത്തകരും പങ്കെടുക്കും.
