കോഴിക്കോട്: വീട്ടിലിരുന്നുതന്നെ അധ്യാപകര്‍ക്കും സഹപാഠികള്‍ക്കുമൊപ്പം ക്ലാസ് മുറിയില്‍ ഇരിക്കുന്ന അനുഭവം ഇനി ഷഹബാസ് അലിക്കും. സമഗ്രശിക്ഷ കേരളയുടെ വെര്‍ച്വല്‍ ക്ലാസ് റൂം പദ്ധതിയാണ് ഷഹബാസ് അലിക്ക് ക്ലാസ് റൂം അനുഭവം സാധ്യമാക്കിയത്. ആരോഗ്യ പ്രശ്‌നങ്ങള്‍ കാരണം സ്‌കൂളിലെത്താന്‍ കഴിയാത്ത കുട്ടികള്‍ക്കുവേണ്ടിയാണ് സമഗ്രശിക്ഷ കേരളം വെര്‍ച്വല്‍ ക്ലാസ് റൂം പദ്ധതി നടപ്പിലാക്കുന്നത്.
എസ്.എസ്.കെ മേലടി ബി ആര്‍ സി അനുവദിച്ച തുകയിലൂടെയാണ് ഷഹബാസ് അലിക്ക് വെര്‍ച്വല്‍ ക്ലാസ് റൂം യാഥാര്‍ത്ഥ്യമായത്. വി ഇ എം യു പി സ്‌കൂളിലെ ഏഴാം ക്ലാസ് വിദ്യാര്‍ത്ഥിയാണ് ഷഹബാസ്. പദ്ധതിയുടെ ഉദ്ഘാടനം വിദ്യാര്‍ത്ഥിയുടെ വീട്ടില്‍ മേപ്പയൂര്‍ ഗ്രാമപഞ്ചായത്ത് പ്രസിഡന്റ് കെ.ടി രാജന്‍ നിര്‍വഹിച്ചു.
ചടങ്ങില്‍ മേലടി ബി പി സി അനുരാജ് വരിക്കാലില്‍ അധ്യക്ഷത വഹിച്ചു. ബി ആര്‍ സി ട്രെയിനര്‍മാരായ എം കെ രാഹുല്‍, അനീഷ് പി, സ്‌കൂള്‍ എച്ച് എം രതീഷ് ബാബു എം കെ, പി ടി എ പ്രസിഡന്റ് വി പി ബിജു, സ്‌പെഷ്യല്‍ എജ്യുക്കേറ്റര്‍ രജിത, അധ്യാപകരായ നാസിബ്, സനി, അഭിജിത്ത് എ, ദൃശ്യ എന്നിവര്‍ സംസാരിച്ചു.
