സഹകരണ ബാങ്കുകള്‍ നഷ്ടത്തിലാണെന്ന് പറഞ്ഞ് ഇനി സ്‌റ്റേറ്റ് ബാങ്ക് ഓഫ് ഇന്ത്യയുടെ പ്രവര്‍ത്തനം പൂട്ടിക്കെട്ടാന്‍ ഇവര്‍ നിര്‍ദ്ദേശം നല്‍കുമോ എന്ന് ഗിരീഷ് ചോദിച്ചു.
പാലാ: സര്‍ക്കാര്‍ തന്നെ വേട്ടയാടുകയാണെന്ന് റോബിന്‍ ബസ് ഉടമ ബേബി ഗിരീഷ് പറഞ്ഞു. അനീതിക്കെതിരെ നിയമ മാര്‍ഗ്ഗത്തില്‍ പോരാട്ടം നടത്തുന്ന ബേബി ഗിരീഷിന് മഹാത്മാഗാന്ധി നാഷണല്‍ ഫൗണ്ടേഷന്‍ ഏര്‍പ്പെടുത്തിയ ശ്രേഷ്ഠകര്‍മ്മ പുരസ്‌കാരം പാലാ മൂന്നാനിയിലുള്ള ഗാന്ധിസ്‌ക്വയറില്‍ ഏറ്റുവാങ്ങിയശേഷം സംസാരിക്കുകയായിരുന്നു അദ്ദേഹം.
തന്റെ റോബിന്‍ ബസ് പിടിച്ചെടുക്കരുതെന്ന് കോടതി നിര്‍ദ്ദേശം നിലവിലുണ്ട്. എന്നാല്‍ പലയിടത്ത് തടഞ്ഞ് പിഴ ഈടാക്കി തന്നെ വേട്ടയാടുകയാണ്. ദിവസവും പതിനായിരക്കണക്കിന് രൂപ പിഴ ഈടാക്കി തന്നെ തളര്‍ത്താനാണ് സര്‍ക്കാരിന്റെ ശ്രമം. വന്‍ തുക ദിനംപ്രതി ഈടാക്കി തന്നെ അടിയറവ് പറയിക്കാന്‍ സര്‍ക്കാര്‍ സംവീധാനങ്ങള്‍ ദുരുപയോഗിക്കുകയാണെന്ന് ഗിരീഷ് പറഞ്ഞു.
കെ എസ് ആര്‍ ടി സിക്ക് നഷ്ടം വരുമെന്ന് പറഞ്ഞ് മറ്റുള്ളവരെ പ്രവര്‍ത്തിക്കാന്‍ അനുവദിക്കാത്ത സാഹചര്യമാണ് കേരളത്തിലുള്ളത്. സഹകരണ ബാങ്കുകള്‍ നഷ്ടത്തിലാണെന്ന് പറഞ്ഞ് ഇനി സ്‌റ്റേറ്റ് ബാങ്ക് ഓഫ് ഇന്ത്യയുടെ പ്രവര്‍ത്തനം പൂട്ടിക്കെട്ടാന്‍ ഇവര്‍ നിര്‍ദ്ദേശം നല്‍കുമോ എന്ന് ഗിരീഷ് ചോദിച്ചു. കെ എസ് ആര്‍ ടി ഈരാറ്റുപേട്ട ഡിപ്പോ പാട്ടത്തിന് നല്‍കിയാല്‍ ലാഭത്തിലാക്കി കാണിക്കാമെന്നും അദ്ദേഹം പറഞ്ഞു.
നിയമാനുസൃതം സംരംഭങ്ങള്‍ തുടങ്ങാന്‍ കേരളത്തില്‍ കഴിയുന്നില്ല. സംരംഭങ്ങള്‍ നടത്താന്‍ എന്തെങ്കിലും തടസ്സമുണ്ടെങ്കില്‍ അതു പരിഹരിച്ചു പ്രവര്‍ത്തനങ്ങള്‍ സുഗമമാക്കേണ്ട സര്‍ക്കാര്‍ സംരംഭങ്ങളെ തകര്‍ക്കാനാണ് ശ്രമിക്കുന്നതെന്നും ഗിരീഷ് പറഞ്ഞു. എന്തു പ്രകോപനം സൃഷ്ടിച്ചാലും ഗാന്ധിയന്‍ മാര്‍ഗ്ഗത്തില്‍ മാത്രമായിരിക്കും തന്റെ പോരാട്ടമെന്നും ഗിരീഷ് കൂട്ടിച്ചേര്‍ത്തു. ജന്മനാട്ടില്‍ ലഭിച്ച ശ്രേഷ്ഠകര്‍മ്മ പുരസ്‌ക്കാരം തനിക്കു പ്രചോദനമാണെന്നും അദ്ദേഹം പറഞ്ഞു.
മഹാത്മാഗാന്ധി നാഷണല്‍ ഫൗണ്ടേഷന്‍ ചെയര്‍മാന്‍ എബി ജെ ജോസ് ശ്രേഷ്ഠകര്‍മ്മ പുരസ്‌കാരം ബേബി ഗിരീഷിന് സമ്മാനിച്ചു. എം എല്‍ എ മാര്‍ പോലും നിയമസഭയില്‍ അക്രമ സമരം നടത്തുന്ന കാലഘട്ടത്തില്‍ ഗാന്ധിയന്‍ മാര്‍ഗ്ഗത്തിലൂടെ അനീതിക്കെതിരെ പോരാടുന്ന ബേബി ഗിരീഷ് മാതൃകയാണെന്ന് അദ്ദേഹം പറഞ്ഞു. സര്‍ക്കാരിനോടുള്ള കടുത്ത എതിര്‍പ്പാണ് ഗിരീഷിന് വര്‍ദ്ധിച്ച പിന്തുണയുടെ കാതല്‍. ഭരണകര്‍ത്താക്കള്‍ പ്രതികാര നടപടികള്‍ അവസാനിപ്പിച്ച് നിയമാനുസൃതം പ്രവര്‍ത്തിക്കാന്‍ സാഹചര്യം ഒരുക്കണമെന്നും എബി ജെ ജോസ് ആവശ്യപ്പെട്ടു.
ജനറല്‍ സെക്രട്ടറി സാംജി പഴേപറമ്പില്‍ അധ്യക്ഷത വഹിച്ചു. മുനിസിപ്പല്‍ കൗണ്‍സിലര്‍ സിജി ടോണി, ചലച്ചിത്രതാരം ബിന്ദു എല്‍സ തോമസ്, സജോ വാളിപ്ലാക്കല്‍, ബിനു പെരുമന, അനൂപ് ചെറിയാന്‍ എന്നിവര്‍ പ്രസംഗിച്ചു.
കോയമ്പത്തൂരിനു പോകും വഴി ബേബി ഗിരീഷിനും റോബിന്‍ ബസിനും രാവിലെ ഗാന്ധിസ്‌ക്വയറില്‍ സ്വീകരണം നല്‍കി.
