ഇടുക്കി: വീടിന്റെ വാതില്‍ ചവിട്ടിപ്പൊളിച്ച് അകത്തുകയറി യുവതിയെ വെട്ടിപ്പരിക്കേല്‍പ്പിച്ച കേസില്‍ പ്രതി അറസ്റ്റില്‍. ഇടുക്കി നെടുങ്കണ്ടം മുണ്ടിയെരുമ ദേവഗിരി സ്വദേശിയായ ഗീതുവിനെ(21)യാണ് പാമ്പാടുംപാറ സ്വദേശി കാളിവിലാസം വിജിത്ത് (22) വീട്ടില്‍ കയറി വെട്ടിയത്.
യുവാതിന്റെ അതിക്രമത്തില്‍ പരിക്കേറ്റ ഗീതുവിനെ തേനി മെഡിക്കല്‍ കോളേജില്‍ പ്രവേശിപ്പിച്ചു. ഇന്ന് വൈകിട്ട് യുവതി വീട്ടില്‍ ഒറ്റയ്ക്കായിരുന്ന സമയത്താണ് പ്രതി യുവതിക്ക് നേരെ അതിക്രമം കാട്ടിയത്. യുവതിയെ കടന്നുപിടിക്കാന്‍ ശ്രമിച്ചത് എതിര്‍ത്തപ്പോളാണ് വാക്കത്തിയെടുത്ത് പെണ്‍കുട്ടിയുടെ കഴുത്തിന് നേരെ വെട്ടിയത്. ഗീതു കൈ കൊണ്ട് വെട്ട് തടുക്കുകയായിരുന്നു.
വെട്ടേറ്റ ഗീതു പ്രാണരക്ഷാര്‍ത്ഥം വീട്ടില്‍ നിന്നും പുറത്തേക്ക് ഓടി. നിലവിളി കേട്ട് ഓടിയെത്തിയ നാട്ടുകാരാണ് യുവതിയെ പ്രതിയില്‍ നിന്ന് രക്ഷിച്ചത്. തുടര്‍ന്ന് ഇയാളെ നാട്ടുകാര്‍ പിടികൂടി പൊലീസില്‍ ഏല്‍പ്പിക്കുകയായിരുന്നു.
